Завершаны працэс вылучэння грамадзян у склад участковых камісій па рэферэндуме

Завершаны працэс вылучэння грамадзян у склад участковых камісій па рэферэндуме. Пра гэта паведамілі ў ЦВК.

Усяго ў склад 5510 участковых камісій вылучана крыху больш за 59 тыс. прадстаўнікоў. Традыцыйна да гэтага працэсу найбольшую цікавасць праяўляюць грамадскія аб’яднанні, якія вылучылі 55,3% ад агульнай колькасці прэтэндэнтаў. Грамадзянамі вылучана 33,7%, працоўнымі калектывамі – 11%.

Цікавасць да працы ва ўчастковых камісіях праявіла 11 палітычных партый. Больш за ўсё прэтэндэнтаў вылучыла Камуністычная партыя Беларусі – 900. Беларуская аграрная партыя дэлегавала 583 члены, Беларуская сацыяльна-спартыўная партыя – 580, Сацыял-дэмакратычная партыя народнай згоды – 239, Ліберальна-дэмакратычная партыя – 197, Беларуская сацыял-дэмакратычная партыя («Грамада») – 7, Аб’яднаная грамадзянская партыя – 2.

Іншыя грамадскія аб’яднанні вылучылі больш за 30 тыс. прадстаўнікоў, у тым ліку звыш 9,4 тыс. – прафесійныя саюзы, якія ўваходзяць у ФПБ, Беларускі саюз жанчын і «Белая Русь» – па 4,4 тыс., БРСМ – 3,8 тыс., Беларускі фонд міру – 3,5 тыс., грамадскае аб’яднанне ветэранаў – 3 тыс.

БЕЛТА