Жыхары Дрыбінскага раёна і курсанты інстытута МУС ушанавалі памяць ахвяр Вялікай Айчыннай вайны

У вёсцы Расна Дрыбінскага раёна 20 чэрвеня ўшанавалі памяць ахвяр Вялікай Айчыннай вайны і Халакоста. Удзельнікамі мітынгу-рэквіема сталі школьнікі, курсанты Магілёўскага інстытута МУС і жыхары раёна.

Як адзначыла старшыня Дрыбінскага раённага Савета дэпутатаў Святлана Завідоўская, дрыбінская зямля палітая крывёй і слязьмі. «Калі мы прыходзім да ветэранаў, заўсёды бяром з сабой дзяцей. Вы не ўяўляеце іх вочы, калі ветэран расказвае, што адбывалася. Яны гавораць са слязамі на вачах, – сказала Святлана Завідоўская. – На нашай зямлі савецкія салдаты здзяйснялі гераічныя подзвігі. На адной з вышак заставаліся два кулямётчыкі, якія прыкрывалі адыход нашых салдат. Калі падышлі немцы, ім давялося звярнуцца да манеўраў, каб зняць адтуль стралкоў. І калі яны падышлі і ўбачылі двух хлопцаў, то сказалі, што немцы вайну ўжо прайгралі, раз нашы салдаты здзяйсняюць такія подзвігі».

Адным з удзельнікаў памятнага мітынгу стаў курсант 1-га курса Магілёўскага інстытута МУС Вячаслаў Салаўёў. «На гэтым месцы я ўпершыню. Такія мерапрыемствы вельмі пазнавальныя для тых, хто не ведае, што тады адбывалася з нашымі людзьмі, якія ваявалі і спрабавалі выжыць у страшныя гады Вялікай Айчыннай вайны. Гэту памяць мы павінны захоўваць, перадаваць сваім дзецям, унукам, расказваць, як нашы дзяды і прадзеды абаранялі нас, выратавалі нашу зямлю і падарылі магчымасць жыць пад мірным небам, – адзначыў курсант. – Мы бачым, якія цяпер адбываюцца канфлікты ў іншых краінах, а ўсё таму, што нехта спрабуе перапісаць гісторыю. І мы павінны вучыцца на памылках мінулага, павінны быць згуртаванымі і жыць у міры».

Начальнік Магілёўскага інстытута МУС і член савета рэспублікі Валерый Палішчук падкрэсліў, што подзвігі нашых продкаў трэба бачыць на свае вочы. «Не проста расказваць, што некалі былі Македонскі і Цэзар. Вось яны, нашы Цэзары і Македонскія, нашы героі, якія не збаяліся, не адмовіліся, не здрадзілі, а стаялі да апошняга, абараняючы сваю Радзіму і сваіх грамадзян. Раз прынёс прысягу, абараняй сваю краіну», – падкрэсліў ён.

Акупацыя Дрыбінскага раёна нямецка-фашысцкімі войскамі доўжылася больш за 800 дзён. За гэты час у раёне нацысты арганізавалі 3 гета, дзе прымусова ўтрымлівалі яўрэеў. У выніку тут было знішчана больш за 2 тыс. яўрэяў. У вёску Расна карны атрад прыбыў у пачатку сакавіка 1942 года. Усяго за некалькі дзён фашысты расстралялі больш за 800 мірных жыхароў. На месцы пахавання пасля вайны ўстанавілі помнік. Ад нямецка-фашысцкіх захопнікаў Дрыбінскі раён вызвалілі ў кастрычніку 1943 года. На тэрыторыі раёна знаходзяцца 43 воінскія і 10 пахаванняў мірных жыхароў.

БЕЛТА