Жыллё, бытавыя ўмовы, інфраструктура - Наталля Пяткевіч пазначыла прыярытэты для замацавання медыкаў

Калі вырашаюцца пытанні арэнднага жылля, ствараюцца прыдатныя сацыяльна-бытавыя ўмовы, неабходная інфраструктура, праблем з кадрамі ва ўстановах аховы здароўя не назіраецца. Такую думку выказала першы намеснік Кіраўніка Адміністрацыі Прэзідэнта Наталля Пяткевіч у час знаёмства з арганізацыяй медыцынскай дапамогі ў Бялыніцкім раёне. Сёння, 2 верасня, Наталля Пяткевіч наведала Ермалавіцкі ФАП, Нежкаўскую амбулаторыю ўрача агульнай практыкі, а таксама паліклініку райцэнтра, дзе не толькі паглядзела іх абсталяванне, але таксама пагутарыла з урачамі і пацыентамі.

Мэту наведванняў аб'ектаў аховы здароўя Наталля Пяткевіч ахарактарызавала так - паглядзець на іх з пункту гледжання шэрагу зваротаў грамадзян, якія паступаюць і ў Адміністрацыю Прэзідэнта, у сродкі масавай інфармацыі, публікуюцца ў сацыяльных сетках.

- Мы, натуральна, за імі сочым і аналізуем. І шмат зваротаў датычыцца менавіта чэргаў у медыцынскіх установах. І таму для маніторынгу сітуацыі мы робім такія выезды. У Бялыніцкім раёне паглядзела ўсе ступені медыцынскай дапамогі: ФАП, амбулаторыю і паліклініку. Вядома, тут сітуацыя проста ідэальная, можна сказаць: і чэргаў няма, і практычна поўная забяспечанасць урачамі, у тым ліку вузкімі спецыялістамі, - ахарактарызавала сітуацыю ў ахове здароўя раёна Наталля Пяткевіч.

На думку першага намесніка кіраўніка Адміністрацыі Прэзідэнта, станоўча адбіваецца дакладная і зладжаная работа паміж кіраўніцтвам медыцынскай установы і мясцовай уладай, а таксама шэфства - калі ёсць гаспадарка або прадпрыемства, якое аказвае дапамогу бальніцы або амбулаторыі:

- Калі вырашаюцца пытанні арэнднага жылля, некаторыя сацыяльна-бытавыя ўмовы, калі ў рэгіёне створана неабходная інфраструктура, транспартная і гэтак далей, тады праблем няма. І гэта яшчэ раз даказвае, што зладжаная праца ўсіх структур дае свой вынік. Я паразмаўляла з людзьмі, якія сядзяць у чэргах, з персаналам рознага ўзроўню. Відаць, што карціна спрыяльная: у людзей настрой адпаведны, у медыцынскіх працаўнікоў ён добры. Прыемна, што маладыя спецыялісты прыязджаюць і тут застаюцца, абзаводзяцца сем'ямі. І трэба заўважыць, што гэта ж не буйны горад. Гэта таксама малы горад, такі, як шэраг іншых у нашай краіне.

На думку Наталлі Пяткевіч, асноўны фактар для замацавання маладых спецыялістаў на месцах - жыллё. Але немалаважнае значэнне гуляе і разнастайны вольны час. Аднак трэба адыходзіць ад разумення, што ўсё павінна дзяржава.

- Усё-такі і бізнэс павінен прыходзіць сюды, не толькі ў буйныя гарады, але і ў такія невялікія населеныя пункты. Бо на развіццё агульнай інфраструктуры павінны працаваць усе. Зразумела, што любая камерцыйная арганізацыя - гэта перш за ўсё прыбытак. Але нашая краіна — гэта ўсё, што робім мы разам. І калі вось такое дзяржаўна-прыватнае партнёрства будзе і ў гэтым аспекце, то перастануць прад'яўляцца прэтэнзіі, бо гэта нашая агульная справа. Мы тут жывем, тут жывуць нашыя дзеці, тут жывуць нашыя бацькі. Ну дык давайце ствараць гэтую інфраструктуру ўсё разам, - падкрэсліла Наталля Пяткевіч.

Першым пунктам наведвання стаў Ермалавіцкі ФАП. Адкрыты летась пасля рамонту, аб'ект абслугоўвае каля 240 чалавек з трох вёсак: Ермаловічаў, Туаліна і Галубаўкі. Загадчыца Ермалавіцкага ФАПа Вольга Фурсава адзначае, што ўмовы на старой пляцоўцы былі не самыя лепшыя, новае ж адпавядае ўсім патрабаванням:

- У новых сценах працуем амаль год. Для якаснага аказання медыцынскай дапамогі ёсць усё неабходнае: пацыенты могуць зрабіць на месцы кардыяграму, памераць ціск, таксама ёсць апараты для вымярэння ўнутрывочнага ціску, глюкометр. Цяпер у нас добрыя ўмовы і для прыёму вузкіх спецыялістаў. Да нас выязджаюць анколаг, хірург, педыятр, гінеколаг. Кожны месяц вядзе прыём тэрапеўт.

Наталля Пяткевіч пацікавілася, як арганізаваны транспартныя зносіны да вёскі, таксама закранула пытанні забяспечанасці медыцынскімі кадрамі ў раёне, умовамі для маладых спецыялістаў, замацавальнасцю. Старшыня Бялыніцкага райвыканкама Вольга Прыстромская адзначыла, што кадравае пытанне ў раёне вырашана: да прыкладу, укамплектаванасці ўрачамі складае 87 працэнтаў. Усе маладыя спецыялісты забяспечаны арэндным жыллём. У Нежкаўскай амбулаторыі ўрача агульнай практыкі Наталля Пяткевіч азнаёмілася з матэрыяльна-тэхнічнай базай медустановы, якая абслугоўвае амаль тры тысячы чалавек з 29 вёсак, у паліклініцы пры Бялыніцкай ЦРБ паразмаўляла з маладымі спецыялістамі, а таксама пацыентамі.

Дарэчы, ва ўстановах аховы здароўя Бялыніцкага раёна працуюць 464 чалавекі, у тым ліку 55 урачоў, 199 чалавек з ліку сярэдніх медыцынскіх работнікаў, 210 - служачых і іншых. Укамплектаванасць урачамі складае 87,3%, сярэднім медперсаналам - 94,9%. Што датычыцца медыцынскай дапамогі, то яе насельніцтву раёна аказвае Цэнтральная раённая бальніца, структура якой прадстаўлена кругласутачным стацыянарам на 112 ложкаў, паліклінікай на 250 наведванняў за змену, пяццю амбулаторыямі ўрача агульнай практыкі на 25 наведванняў у змену і 9 фельчарска-акушэрскімі пунктамі. У раёне абслугоўваецца амаль 18 тысяч чалавек, з іх у сельскай мясцовасці жыве амаль дзевяць тысяч.

 СБ