Жыллёва-камунальныя і маёмасныя пытанні хвалявалі тых, хто звярнуўся на асабісты прыём да Аляксандра Гарошкіна

Асабісты прыём грамадзян правёў 18 чэрвеня старшыня абласнога Савета дэпутатаў Аляксандр Гарошкін.

Так, адна з заяўніц звярнулася па садзейнічанне ў аказанні юрыдычнай дапамогі па пытанні ўступлення ў спадчыну і падзелу маёмасці пасля смерці яе маці. Магіляўчанка патлумачыла, што яна падала заяву аб прыняцці спадчыны натарыусу, але адведзеныя законам 6 месяцаў яшчэ не прайшлі. Аднак нядаўна высветлілася, што былы муж маці, з якім яна ўжо пяць гадоў у разводзе, самавольна пракраўся ў прыватны дом, размешчаны ў адным з райцэнтраў, па сваім меркаванні распарадзіўся некаторай маёмасцю і змяніў замкі. Па словах заяўніцы, мужчына па рашэнні суда мае права толькі на частку маёмасці і адну другую долю ў праве ўласнасці на будматэрыялы, укладзеныя ў рэканструкцыю дома падчас вядзення сумеснай гаспадаркі ў шлюбе. Жанчына ўлічвае, што рашэнне суда было не выканана былымі мужам і жонкай, пры гэтым лічыць, што да яе ўступлення ў спадчыну якія-небудзь дзеянні з маёмасцю з боку мужчыны неправамерныя.

Аляксандр Гарошкін растлумачыў, што ў такой сітуацыі трэба звярнуцца ў абласны суд па тлумачэнне раней выдадзенага раённым судом рашэння. Іншага шляху вырашэння сітуацыі няма. Пры гэтым ён запэўніў, што, калі заяўніцы спатрэбіцца дапамога ў складанні звароту ў суд, гэта дапамога ёй будзе аказана.

Яшчэ адна магіляўчанка была занепакоена тым, што ў графіку капітальных рамонтаў дамоў няма іх дома, размешчанага на вул.Першамайскай. Хаця ў 2023 годзе яна ўжо звярталася ў гарвыканкам наконт устаноўкі брыля над пад'ездам і тады ёй далі адказ, што перспектыўным планам на 2024-2028 гады ў доме запланаваны капрамонт. Аднак да гэтага часу рамонт не пачаўся, і жанчына вырашыла пацікавіцца аб тэрмінах.

Заяўніцы растлумачылі, што якраз у ліпені бягучага года чакаецца атрыманне праектна-каштарыснай дакументацыі і дом плануецца паставіць у графік капрамонтаў на першы квартал 2026 года. Аляксандр Гарошкін узяў пытанне на асабісты кантроль.

Юлия Таранава, фота Галіны Гаўрыловіч