Зінаіда Пянькова: важна, што ў суверэннай Беларусі захоўваюцца гісторыя і добрыя традыцыі

Важна, што ў суверэннай Беларусі захоўваюцца гісторыя і добрыя традыцыі. Такім меркаваннем падзялілася старшыня гарадской арганізацыі Беларускага грамадскага аб’яднання ветэранаў Зінаіда Пянькова падчас святочных мерапрыемстваў у Магілёве, прысвечаных 105-й гадавіне Кастрычніцкай рэвалюцыі.

«У нас у горадзе пражывае 83,5 тыс. ветэранаў. Безумоўна, гэта ў асноўным ветэраны працы. Ветэранаў Вялікай Айчыннай вайны ў нас 62 чалавекі, 11 удзельнікаў блакады Ленінграда і 273 вязні канцэнтрацыйных лагераў. Гэта тыя людзі, якія звязаныя з гэтым днём. Усё сваё жыццё мы выходзілі 7 лістапада на дэманстрацыі. Гэта заўсёды было светлае, добрае і яркае свята. І ўсе гэтыя ўспаміны дагэтуль жывуць у памяці старэйшага пакалення. Таму мы з вялікай павагай ставімся да Дня Кастрычніцкай рэвалюцыі, – падзялілася яна. – І, ведаеце, людзей нават не трэба клікаць, тэлефанаваць ім дадаткова. Яны заўсёды прыходзяць самі: хтосьці з кветачкамі, хтосьці са сцягамі, а хтосьці проста аддаць даніну памяці і павагі нашай агульнай гісторыі».

Зінаіда Пянькова падкрэсліла важнасць захавання сувязі паміж рознымі пакаленнямі беларусаў. «Дарагога варта, што ў сучаснай Беларусі працягваюць захоўваць гэтую традыцыю. І я ганаруся нашымі людзьмі, нашым народам, таму што яны памятаюць усё святое. Бо гэты дзень заўсёды прыносіў толькі радасць. І мы заўсёды імкнуліся зрабіць нешта значнае: адкрыць паліклініку, патрэбную дарогу або дзіцячы сад. Старэйшае пакаленне таксама не заставалася ўбаку: хтосьці наводзіў парадак у горадзе, у сваіх дварах. Мы рыхтаваліся да гэтага дня заўсёды. І цяпер прыемна адзначыць, што гэтая добрая традыцыя – абменьвацца значнымі падарункамі – засталася дагэтуль, – адзначыла яна. – Мы шмат гаворым з моладдзю, расказваем ёй гісторыю нашай краіны і нашага жыцця. Таму што хочацца, каб добрыя традыцыі не толькі захаваліся наступнымі пакаленнямі, але і прымнажаліся».

Яшчэ адным удзельнікам урачыстага мітынгу стаў намеснік старшыні Магілёўскай абласной арганізацыі Беларускага грамадскага аб’яднання ветэранаў Валерый Яленскі. «З пункту гледжання гісторыі – гэта самая маштабная, самая вялікая палітычная падзея, якая здзейснілася ў 1917 годзе. І яна мела каласальнае значэнне не толькі для стварэння нашай нацыянальнай дзяржавы, але і для іншых краін, бо гэта свята непарыўна звязана з гісторыяй старэйшых пакаленняў, з гераічным мінулым нашага народа, – адзначыў ён. – Тое, што адбывалася ў савецкі перыяд, павінна быць узята за аснову наступнымі пакаленнямі. Таму што ўсё тое, што было пабудавана ў савецкі перыяд, і цяпер працягвае працаваць. Найбуйнейшыя заводы, фабрыкі, дарогі, найважнейшыя будоўлі – той падмурак, на якім цяпер мы ўсе жывем. І той найвышэйшы патрыятызм, які быў у савецкіх людзей – усё гэта прыклады для далейшага развіцця. Шмат было ў той перыяд пасля рэвалюцыі добрага. І яшчэ адзін момант, які трэба ўлічваць моладзі і старэйшаму пакаленню: важна здабываць усё карыснае з таго вопыту, але ў той жа час рабіць працу над памылкамі і не дапускаць іх».

Да ўрачыстых мерапрыемстваў у Магілёве далучылася моладзь горада і працоўныя калектывы. Разам са сваім калектывам Магілёўскага мясакамбіната аддаць даніну нашай гісторыі прыйшла начальнік аддзела развіцця і маркетынгу Алеся Русаленка. Жанчына расказала, што прыйшла сёння на плошчу Леніна, таму што гэта важны дзень у жыцці яе сям’і. «Гэты дзень калісьці прадвызначыў далейшы шлях нашай краіны ў цэлым. І ён прывёў нас да таго, што сёння наш народ разам, мы адзіныя ў сваіх памкненнях, – расказала яна. – Я мяркую, што, калі людзі не памятаюць сваёй гісторыі, яны не могуць быць нацыяй. Вельмі важна не толькі памятаць свае карані, але і ведаць іх гісторыю, іх шлях развіцця, які яны прайшлі да нас. І гэтыя веды трэба перадаваць дзецям, таму што яны – наша будучыня. І рабіць гэта трэба не проста на словах, а на ўласным прыкладзе».

БЕЛТА