Зніклы меч мсціслаўскага рыцара вяртаецца ў Беларусь

Меч мсціслаўскага рыцара вяртаецца ў Беларусь: 7 гадоў таму ён знік падчас знаходкі рыцарскіх даспехаў 500-гадовай даўніны.

Нагадаем, што ў 2013 годзе ў рацэ Віхра пад Мсціславам былі знойдзеныя даспехі рыцара, датаваныя канцом 15 – пачаткам 16 стагоддзя. Гэта стала археалагічнай сенсацыяй у Беларусі і за яе межамі. Адрэстаўраваныя даспехі цяпер захоўваюцца ў музеі гісторыі Магілёва. Аднак радасць ад такой каштоўнай знаходкі азмрочыла знікненне мяча, які, як падазравалі, быў прададзены за мяжу. Усе гэтыя гады магілёўскія гісторыкі і музейшчыкі сачылі за сітуацыяй з дапамогай сяброў-калекцыянераў, шукалі меч.

У музеі лічаць фантастыкай тое, што меч знайшоўся. Музейшчыкі з дапамогай гарадскіх уладаў і неабыякавых людзей змаглі яго выкупіць на адным з еўрапейскіх аўкцыёнаў. Кошт– каля Br15 тыс. – бюджэт Магілёва кампенсуе каля паловы сумы. На астатнюю частку музей шукае спонсарскую дапамогу.

ТРК «Магілёў»