Адзіны дзень бяспекі дарожнага руху пад дэвізам «Разам – за бяспеку на дарогах!»пройдзе ў Магілёўскай вобласці 25 студзеня

Адзіны дзень бяспекі дарожнага руху пад дэвізам «Разам – за бяспеку на дарогах!»пройдзе ў Магілёўскай вобласці 25 студзеня. Пра гэта паведаміла спецыяліст аддзялення па агітацыі і прапагандзе УДАІ УУС аблвыканкама Крысціна Котава.

Супрацоўнікі ДАІ адправяцца на прадпрыемствы, навучальныя ўстановы і аўташколы, каб чарговы раз расказаць кіроўцам і пешаходам, да чаго прыводзяць недысцыплінаванасць і неразважлівасць на дарогах. Галоўнай тэмай стане прапаганда захавання ПДР усімі ўдзельнікамі дарожнага руху.

«Многія пешаходы не хочуць разумець, што кіроўца не ў сілах імгненна спыніць свой аўтамабіль, каб пазбегнуць наезду, – адзначыла суразмоўца. – У цёмны час сутак гэта нясе яшчэ большую небяспеку. Кіроўцам варта быць вельмі ўважлівымі пры праездзе па слаба асветленых або неасветленых участках дарог. Пазбегнуць аварый вельмі складана, але прадухіліць – магчыма, калі ўдзельнікі дарожнага руху будуць праяўляць адзін да аднаго ўвагу і павагу, бо гэта і ёсць частка захавання Правілаў дарожнага руху, якая падкрэслівае перш за ўсё культуру кожнага з нас».