Больш за 500 навагодніх ёлак - якія свецяцца, верцяцца, размаўляюць, трансфармуюцца і нават гуляюць у квэст - сабраліся ў Магілёве на абласным этапе Рэспубліканскага конкурсу «ТэхнаЁлка».
Выстава размешчана ў Магілёўскім абласным цэнтры творчасці і літаральна захоплівае з парога. Тут няма дзвюх аднолькавых работ - кожная ёлка расказвае сваю гісторыю, вырашае сваю тэхнічную задачу і нясе ў сабе навагодні настрой. І хаця конкурс ацэньвае прафесійнае журы, атмасфера ў залах - святочная. Глядзіш на маторчыкі, святлодыёды, самаробных снегавікоў з тэрмаклею - і разумееш: гэта не проста ёлкі, гэта мары, сабраныя рукамі.
У конкурсе прынялі ўдзел дзеці старэйшыя за 8 гадоў з устаноў дадатковай адукацыі, сярэдніх спецыяльных і прафесійна-тэхнічных каледжаў Магілёўскай вобласці.
«Выстава цудоўная, своеасаблівая, разнапланавая, - кажа дырэктар Магілёўскага абласнога цэнтра творчасці Ігар Аўсеенка. - Геаграфія ўражвае: практычна з кожнага раёна вобласці прывезлі свае экспанаты. Калі гэта «Сімвал 2026 года», значыць, гэта менавіта сімвал года. Калі «Хайтек-ёлка» - яна сапраўдная, з электронікай і рухам. А калі «РэтраЁлка» - то абавязкова ў духу мінулага стагоддзя. У кожнай зале - асобная намінацыя, і ў кожнай ёсць свая разыначка. Прычым не адна! Вось і атрымліваецца задача з трыма невядомымі для журы: як абраць лепшае, калі ўсё годна».
Загадчыца аддзела Магілёўскага абласнога цэнтра творчасці Вольга Патапава адзначыла, што на конкурс паступіла каля 500 работ у васьмі намінацыях - як індывідуальных, так і калектыўных. Сярод іх – «Альтэрнатыўная ёлка», «Дызайн-ёлка», «Ёлка-трансформер», «МультымедыяЁлка», «РэтраЁлка», «Калядная кампазіцыя», «Хайтэк-ёлка» і «Сімвал 2026 года». У апошняй - вогненныя коні: ад мініятурных поні да вялікіх «скакуноў з жалеза».
Адной з самых незвычайных прац стаў навагодні адвэнт-каляндар It's Time студэнта Магілёўскага дзяржаўнага політэхнічнага каледжа Аляксея Старавойтава. У яркім корпусе - некалькі акенцаў з міні-канструктарамі і галоўная скрыня, якая сама адчыняецца ў зададзены дзень з гукам і надпісам «Ура!» на экране. Увесь адвэнт-каляндар працуе на праграмнай сістэме. «Рабіў амаль месяц, - кажа Аляксей. - Хацеў, каб было не толькі прыгожа, але і карысна для дзяцей».
Студэнтка Магілёўскага дзяржаўнага тэхналагічнага каледжа Валянціна Марцалава разам з аднагрупнікамі і педагогамі распрацавала настольны квэст - Калядная сцежка. «Дзеці кідаюць кубік, рухаюцца па слядах звяроў, выбіраюць цацку на ёлцы, скануюць QR-код і адказваюць на пытанні аб святочных традыцыях. За кожны правільны адказ атрымліваюць сняжынку. Набраўшы тры, можна выцягнуць навагодняе пажаданне, - расказвае Валянціна. - Працавалі над квэстам тры тыдні. Дзяўчынкі ўклалі ў яго ўсё: кожная дэталь была старанна прадумана».
А студэнт Уладзіслаў Шафранкоў разам з аднакурснікамі прадставіў экспанат у рэтра-тэматыцы 1973 года: з вінілавымі пласцінкамі, дожджыкам, званочкамі, маторчыкам і нават снегавіком, зробленым з тэрмаклею. «Мае аднагрупнікі ўпрыгожвалі ёлку, а я адказваў за электроніку, падключыў Bluetooth і радыё, - распавядае Уладзіслаў. - Праз тэлефон можна ўключыць любую навагоднюю песню. А люстэркі ў гэтай працы ствараюць дадатковы візуальны эфект».
«Кожная праца - гэта частка дзіцяці, яго душа і праца, - падкрэсліла Вольга Патапава. - Журы з шасці прафесіяналаў будзе ацэньваць усе экспанаты па адзіных крытэрыях. Па чатыры лепшыя работы з кожнай намінацыі паедуць на рэспубліканскі этап у Мінск 27 лістапада. Там іх размесцяць на агульнай экспазіцыі да канца снежня».
Атмасфера ў залах цэнтра творчасці сапраўды навагодняя: шум маторчыкаў, мігаценне агнёў, смех, абмеркаванні і адчуванне, што свята ўжо пачалося.
Пры выкарыстанні матэрыялаў актыўная гіперспасылка на mogilev-region.gov.by абавязковая
