БелАЭС паставіла ў энергасістэму краіны першы мільярд кілават-гадзін

Першы мільярд кВт/г электраэнергіі з моманту ўключэння ў аб’яднаную энергасістэму краіны выпрацаваў першы энергаблок Беларускай атамнай электрастанцыі.

Зараз тут працягваецца этап доследна-прамысловай эксплуатацыі, праводзіцца тэсціраванне сістэм і абсталявання на намінальным узроўні магутнасці. Каб азнаёміцца з ходам работ, а таксама ў межах партнёрскага агляду нацыянальнага плана дзеянняў па выніках стрэс-тэстаў, праведзеных у 2018 годзе, Беларускую АЭС 9–10 лютага наведаюць эксперты Еўрапейскай камісіі і Еўрапейскай групы рэгулюючых органаў у галіне ядзернай бяспекі (ENSREG).

Як адзначыў намеснік галоўнага інжынера БелАЭС па бяспецы і надзейнасці Рынат Валееў, у групу, якую ўзначаліць генеральны дырэктар Цэнтра па ядзернай і радыяцыйнай бяспецы Фінляндыі (STUK) Петэры Тыйпана, увойдуць эксперты з Аўстрыі, Бельгіі, Вялікабрытаніі, Венгрыі, Германіі, Літвы, Украіны, Фінляндыі, Чэхіі. Эксперты, якія падзеляцца на тры падгрупы, плануюць наведаць будынкі ўпраўлення першага энергаблока, дызельнай электрастанцыі, рэактара другога энергаблока, пункт кіравання супрацьаварыйнымі дзеяннямі, пажарную часць і іншыя аб’екты. Акрамя таго, як расказаў Рынат Валееў, яны азнаёмяцца з матэрыяламі па рэалізацыі мерапрыемстваў нацыянальнага плана дзеянняў па выніках стрэс-тэстаў і прааналізуюць гэтыя матэрыялы.

– Падчас падрыхтоўчай працы да гэтага візіту мы стараліся максімальна пайсці насустрач экспертнай групе, каб яна магла азнаёміцца з усімі пытаннямі, якія яе цікавяць. Шэраг з іх дэталёва прагаворвалі загадзя. Былі і просьбы, якія, можа, не зусім упісваюцца ў звыклы фармат такіх візітаў. Напрыклад, па арганізацыі відэаканферэнцсувязі для магчымасці абмеркаваць са сваімі калегамі матэрыялы ў рэжыме анлайн.

Таксама Рынат Валееў нагадаў: Беларусь правяла стрэс-тэсты па працэдуры Еўрапейскага Саюза на добраахвотнай аснове. І абсалютна добраахвотна дала Еўрапейскім экспертам магчымасць ацаніць, ці ёсць на БелАЭС «запасы бяспекі» над патрабаваннямі, усталяванымі нашым нацыянальным заканадаўствам. У выніку дэфіцытаў бяспекі на АЭС выяўлена не было. А вынікам гэтай працы стаў наш нацыянальны план дзеянняў, які змяшчае 23 пункты з тэрмінамі рэалізацыі ў перыяд з 2019-га па 2025 гады.

Рынат Валееў расказаў, што партнёрская праверка ўключае некалькі этапаў. Лютаўскі візіт – адзін з іх.

– Наперадзе яшчэ больш важны і працяглы візіт экспертаў на БелАЭС, які пры ўмове спрыяльнай эпідэміялагічнай абстаноўкі запланаваны на май–чэрвень 2021 года. Пасля гэтага будзе падрыхтавана фінальная справаздача. Пасля ўзгаднення ENSREG гэты дакумент будзе прадстаўлены беларускаму боку.

СБ, фота - БЕЛТА