Берагавыя лініі вадаёмаў Магілёўскай вобласці прывядуць у парадак падчас акцыі «Чысты вадаём»

Берагавыя лініі вадаёмаў Магілёўскай вобласці прывядуць у парадак падчас рэспубліканскай акцыі «Чысты вадаём». Пра гэта паведамілі ў абласной арганізацыйнай структуры дзяржаўна-грамадскага аб’яднання «Беларускае таварыства паляўнічых і рыбаловаў».

Акцыя стартавала сёння і працягнецца да 19 красавіка. Яна ў першую чаргу накіравана на экалагічнае выхаванне ўсіх слаёў насельніцтва, прыцягненне ўвагі да праблемы забруджвання вадаёмаў, а таксама на прывядзенне ў парадак прыбярэжнай зоны вадаёмаў і вадацёкаў напярэдадні адкрыцця сезона масавага актыўнага адпачынку на прыродзе.

«Для ўдзелу ў акцыі дастаткова звярнуцца па месцы жыхарства ў арганізацыйную структуру БТПР, дзе паведамяць аб месцы і часе яе правядзення, а таксама выдадуць усё неабходнае. Можна і самастойна прыехаць у любімыя месцы адпачынку і прыбраць смецце з берагавой лініі», – сказалі суразмоўцы.

Акцыя «Чысты вадаём» стала традыцыйнай і носіць рэспубліканскі характар. З 2014 года падчас мерапрыемстваў супрацоўнікі абласной БТПР сумесна з прадстаўнікамі іншых арганізацый і проста неабыякавымі да прыроды грамадзянамі прывялі ў парадак больш за 80 км берагавой лініі вадаёмаў Магілёўшчыны. За гэты час сабрана каля 50 куб. м смецця і вывезена на палігоны ЦБА.

Да ўдзелу ў акцыі запрашаюцца ўсе жадаючыя. Дадатковую інфармацыю можна даведацца ў Магілёўскай арганізацыйнай структуры БТПР па тэлефонах (8 0222) 74-41-31 і 74-53-43.