Гарадскі суботнік пройдзе ў Магілёве 6 красавіка

Гарадскі суботнік пройдзе ў Магілёве 6 красавіка, паведамілі ў гарвыканкаме.

Прадпрыемствы горада прывядуць у належны санітарны стан уласныя, прылеглыя і замацаваныя тэрыторыі. Будзе арганізавана санітарная ўборка на аб’ектах ведамаснага жыллёвага фонду, унутрыдамавых тэрыторыях, будаўнічых пляцоўках.

«Мы запрашаем магілёўцаў прыняць удзел у мерапрыемстве, – адзначылі суразмоўцы. – Разлічваем, што да навядзення чысціні і парадку на гарадскіх вуліцах, лесапаркавых зонах, пляжах і месцах адпачынку падключыцца моладзь».

Асаблівая ўвага будзе нададзена прыватнаму сектару. Гарвыканкам спадзяецца, што ўласнікі індывідуальных жылых дамоў праявяць актыўнасць у пытаннях санітарнай уборкі як уласных, так і прылеглых тэрыторый.

Кіраўнік абласнога цэнтра Уладзімір Цумараў плануе працаваць на пасадцы дрэў у Паднікольскім парку.