Малако робіць грошы і... наадварот
Планаваныя да будаўніцтва ў Магілёўскай вобласці МТК - гэта новыя працоўныя месцы і значнае павелічэнне «столі» надояў
Для прадаўжэння мадэрнізацыі малочнай жывёлагадоўлі на 2023—2024 гады запланавана будаўніцтва новых малочнатаварных комплексаў. У кожнай вобласці ўзвядуць і рэканструююць па дзесяць аб'ектаў. У нядаўна апублікаванай пастанове Саўміна нумар 50 вызначаны канкрэтныя сельгаспрадпрыемствы, тыпы жывёлагадоўчых аб'ектаў. Стаўка на новыя сучасныя пляцоўкі апраўдана: дзякуючы мадэрнізацыі малочнай галіны ў апошнія гады налічваецца 1,6 тысячы сучасных тэхналагічных малочнатаварных ферм, на якіх больш за 65 працэнтаў дойнага статка. Менавіта на такіх МТК вырабляецца каля 70 працэнтаў усяго малака. У Магілёўскай вобласці ўжо вызначыліся з гаспадаркамі, дзе ўзвядуць жывёлагадоўчыя аб'екты: чатыры - у Магілёўскім, тры - у Кіраўскім, два - у Бабруйскім і адзін - у Горацкім раёнах.
І далей нарошчваць аб'ёмы вытворчасці, найбольш актыўна вырашаць «кватэрнае пытанне» для кароў збіраюцца ў Магілёўскім раёне. Інвестуюць у сучасныя комплексы ў ААТ «Цішоўка», ААТ «Магілёўскі лянок», СДП «Авангард» РУП «Магілёўскае аддзяленне Беларускай чыгункі» і філіяле «Вендараж» РУП «Магілёўэнерга». Тут будуць падобныя комплексы на 600 галоў дойнага статка. Ужо вызначаны ўчасткі для будаўніцтва, ідзе распрацоўка праектна-каштарыснай дакументацыі, пошук падрадчыкаў. Кожная гаспадарка думае, як укамплектаваць новыя аб'екты. У канчатковым рахунку гэта дасць сур'ёзны дадатак па малаку ў раёне.
Сама будоўля МТК - важны этап працы. Але не менш намаганняў, упэўнены дырэктар ААТ «Магілёўскі лянок» Алег Івашкевіч, трэба прыкласці для пісьменнага планавання па запаўненні комплексу пагалоўем, стварэння трывалай кармавой базы:
- Ужо зараз распрацоўваем новую структуру пасяўных плошчаў. Плануем нарошчваць тэрыторыю сяўбы высокабялковай і ўраджайнай люцэрны і атрымліваць з яе тры-чатыры ўкосы. Да адведзеных 400 гектараў дададзім яшчэ 350, каб да зімова-стойлавага перыяду 2024/25 года забяспечыць сябе неабходнымі кармамі. Для вырашэння бялковай праблемы стаўка таксама на азімы рапс, свірэпіцу.
Дэдлайн па запаўненні МТК на 100 працэнтаў, дакладна пралічаны ў самой гаспадарцы, - верасень 2025-га. Галоўны заатэхнік Уладзімір Грыбоўскі раскладвае па палічках (а дастасавальна да пабудоваў — секцый), як укамплектуюць новыя плошчы:
- Запаўняльнасць паэтапная. Заданне - да канца 2025 года. Але пралічылі, што зробім раней. Зыходзячы з тэхналогіі, тэрмін уводу новага комплексу зрушваецца на верасень 2025-га. Няцелі, якія расцеляцца ў жніўні, пасля радзільнага аддзялення будуць паступаць і даіцца ўжо ў новым комплексе ў 2024-м. Першая партыя па чаканых расцелах павінна скласці 70 галоў. Новы МТК на 600 галоў падобны да ўжо існуючага ў Макарэнцах. Хлеў падзелены на секцыі, у кожнай з якіх - 72 галавы. Тэхналагічна прадугледжваецца, што секцыя павінна запаўняцца адзін раз у месяц, каб рух ішоў рытмічна, а памяшканне выкарыстоўвалася максімальна. Улічваючы новыя павевы, рэкамендацыі навукоўцаў, практычныя дадзеныя, неабходна, каб яна была на 10 адсоткаў вальней: так у жывёлы ёсць права выбару, дзе легчы, як зручней падысці да кармавога стала. Таму ад 72 адбіраем 10 працэнтаў і атрымліваем 65. А зыходзячы з кратнасці даення, найбольш аптымальна засяліць 60 галоў, каб не зацягваць з-за дзвюх-трох жывёл час даення. Вось і выходзіць, што за дзесяць месяцаў запоўнім МТК.
Сёння ў «Магілёўскім лянку» 1430 галоў дойнага статка і два комплексы замкнёнага тыпу ў Грыбанах і Макарэнцах. Новы комплекс, па сутнасці, пашырэнне існуючага ў Макарэнцах - будзе суседнічаць з наяўнымі адрынамі і ўвойдзе ў гэты замкнёны цыкл.
- Два будынкі для дойнага статка, асобнае - з даільна-малочным блокам для раздою, - тлумачыць Уладзімір Уладзіміравіч. - Але неабходна разумець, што ў будучыні з'явіцца столькі ж маладняку. Да 2025 году, да прыкладу, плюс 300 цялят - для іх таксама патрэбныя памяшканні. Улічваючы павелічэнне пагалоўя, разглядаем магчымасць дадатковай будоўлі. Цяпер узводзіцца тэнтавік для сухастойнай жывёлы.
Будаўніцтва новага комплексу мае на ўвазе павелічэнне аб'ёмаў вытворчасці.
- Нам, вядома, яшчэ далёка да малочнай столі. Сёння даім 6,5 тысячы кілаграмаў на карову за год. Наступны рубеж - 9 тысяч, далей - 11. Таму рух наперад ёсць заўсёды, - упэўнены кіраўнік прадпрыемства.
Гэта ў «Магілёўскім лянку» пацвярджаюць на справе, цягам ужо трох гадоў стабільна плюсуючы па малаку на 9—10 працэнтаў. Напрыклад, удоі на МТК «Макарэнцы» яшчэ тры гады таму складалі 8 тон, зараз за суткі выходзіць 12. Брыгадзір фермы Васіль Ісаеў тлумачыць, што тут па-новаму падышлі да кармлення:
- Асноўнае звяно выдаткаў - канцэнтраты, кошт бялковай сыравіны, збожжа. Самі рыхтуем камбікорм: вотруб'е, піўная дробіна, соевы і рапсавы шрот. За кошт меншых затрат на зерне ідзе патанненне рацыёну ў цэлым.
У выніку ў агульнай складанасці сельгаспрадпрыемства штодня рэалізуе 26 тон малака, пры гэтым рэнтабельнасць на комплексе ў Грыбанах - 52 працэнты, у Макарэнцах - 48.
- Сённяшняя рэнтабельнасць - гэта запчасткі, набыццё бялковай сыравіны, спецадзення, прэміраванне, - дадае і галоўны заатэхнік. - Галоўнае - пісьменна размеркаваць грашовыя патокі. Мы ўдзельнічаем у вытворчасці запатрабаванай прадукцыі і стараемся зарабіць: здаць малако гатункам экстра, больш надаіць, дабіцца лепшай якасці. Але ключавое ва ўсім вытворчым ланцужку - яе вялікасць карова.
На комплекс у гаспадарцы ўскладаюць спадзяванні не толькі ў вытворчым, але і ў сацыяльным плане. Бо новы аб'ект - гэта працоўныя месцы, якіх будзе яшчэ каля 20. Ахвотныя ўжо ёсць. Палітыка «Магілёўскага лянка» такая: перш - падвоз людзей, калі трэба, рашэнне кватэрнага пытання.
У ТЭМУ
Толькі за мінулую пяцігодку ў Беларусі пабудаваны і рэканструяваны 472 малочнатаварныя фермы, уведзены ў эксплуатацыю 12 новых свінагадоўчых комплексаў, адноўлены 22 свінакомплексы, пабудаваны і рэканструяваны 32 птушкафабрыкі. На створанай вытворчай базе ў 2022 годзе ў адносінах да 1995-га вытворчасць малака павялічылася ў 2,5 раза, яек - на 50 працэнтаў, рэалізацыя жывёлы і птушкі - у 2,1 раза.
Пры выкарыстанні матэрыялаў актыўная гіперспасылка на mogilev-region.gov.by абавязковая
17.05.2024 - 17:57
Дэлегацыя Магілёўскай вобласці знаходзіцца з афіцыйным візітам у Кітайскай Народнай Рэспубліцы
15.05.2024 - 13:05
Мадэрнізацыя абсталявання праходзіць на бабруйскай «Белшыне» (відэа)
08.05.2024 - 20:31
Леанід Мартынюк: наша прамысловасць не стаіць на месцы і мае добрыя тэмпы нават у цяперашніх умовах
25.04.2024 - 16:38
За апошнія пяць гадоў у эканоміку Магілёўскага раёна прыцягнута два мільярды рублёў інвестыцый
22.04.2024 - 10:15
«Бабруйскаграмаш» правёў выпрабаванне навінкі - культыватара КМП-10
15.04.2024 - 16:22
Першыя ўраджаі таматаў збіраюць у Кіраўскім «Рассвете» (відэа)