Хрэсны ход з Магілёва ў Баркалабава зробяць праваслаўныя паломнікі 23 ліпеня. Шэсце прымеркавана да свята ў гонар іконы Божай Маці Баркалабаўскай, якое адзначаецца 24 ліпеня, паведамілі ў Магілёўскай і Мсціслаўскай епархіі.
Вернікі адправяцца ў дарогу раніцай 23 ліпеня пасля набажэнства ў Свята-Мікольскім манастыры ў Магілёве. Далей 40-кіламетровы шлях багамольцаў будзе пралягаць праз Буйнічы, Салтанаўку, Дашкаўку і іншыя населеныя пункты. Фінальным пунктам шэсця стане Спаса-Узнясенскі манастыр у пасёлку Баркалабава Быхаўскага раёна, дзе знаходзіцца цудатворны абраз. Завершыцца мерапрыемства 24 ліпеня святочнай літургіяй і трапезай.
Баркалабаўская ікона Божай Маці – адна з самых шанаваных святынь ў Беларусі. У многіх храмах знаходзяцца яе спісы. Згодна з паданнем, абраз у Баркалабаўскай мясціны пакінуў, вяртаючыся з паходу, рускі князь Пажарскі. Коні князя спыніліся каля манастыра і не рухаліся далей, паказаўшы гэтым месца новага знаходжання святыні.
Знакамітая ікона асабліва праславілася цудамі падчас Паўночнай вайны і вайны 1812 года. Пасля 1920-га, калі манастыр быў закрыты, абраз захоўвалі вернікі. А напярэдадні Вялікадня 1953 года цудатворны абраз прынеслі ў Свята-Траецкі храм Быхава. Там ён захоўваўся да ліпеня 2010 года, нязменна збіраючы вялікую колькасць вернікаў. 25 ліпеня 2010 года старажытны абраз быў урачыста перанесены ў адноўлены Баркалабаўскі манастыр. Зараз тут адзначаюць двайное свята цудатворнага абраза: 24 ліпеня – дзень здабыцця і 25 ліпеня – дзень перанясення іконы з горада Быхава ў Баркалабаўскі манастыр.
Пры выкарыстанні матэрыялаў актыўная гіперспасылка на mogilev-region.gov.by абавязковая
