Інструктыўна-метадычны семінар напярэдадні АДІ прайшоў у Магілёўскім аблвыканкаме

Інструктыўна-метадычны семінар правяла сёння ў Магілёўскім аблвыканкаме начальнік галоўнага ўпраўлення ідэалагічнай работы і па справах моладзі аблвыканкама Кацярына Музычэнка. Мерапрыемства традыцыйна праходзіць напярэдадні адзінага дня інфармавання, які ў гэтым месяцы адбудзецца 20 лістапада.

У ім прынялі ўдзел кіраўнікі і прадстаўнікі структурных падраздзяленняў аблвыканкама, члены абласных інфармацыйна-прапагандысцкіх груп аблвыканкама, члены Каардынацыйнага савета грамадскіх аб'яднанняў і палітычных партый рэгіёна, прадстаўнікі працоўных калектываў структурных падраздзяленняў аблвыканкама. У студыях рэгіёнаў - сябры раённых інфармацыйна-прапагандысцкіх груп.

Тэма АДІ ў гэтым месяцы: «Кібербяспека і прафілактыка кіберзлачыннасці».

«Тэма гэтая вельмі актуальная, з якой мы самі ўвесь час сутыкаемся, як і любы жыхар краіны, – адзначыла ў сваім уступным слове Кацярына Музычэнка. - І трэба ведаць, як своечасова распазнаць кіберпагрозы і пісьменна супрацьстаяць ім.

Асабліва ўразлівымі аказваюцца падлеткі і пажылыя грамадзяне, не знаёмыя з інфармацыйнай пісьменнасцю».

У працяг тэмы выступіла загадчык аддзела інфармацыйнага маніторынгу і аналітыкі Інфармацыйнага агенцтва «Магілёўскія ведамасці» Алена Шапялёва, якая распавяла аб распаўсюджаных схемах кіберзлачынстваў і мерах супрацьдзеяння.

Юлія Таранава, фота Галіны Гаўрыловіч