Каля 30 сюжэтаў і паўсотні гасцей. У Магілёве пройдзе тэлемарафон «Сагрэем дзіцячыя сэрцы»

Каля 30 сюжэтаў і паўсотні гасцей – тэлерадыёкампанія «Магілёў» рыхтуецца да тэлемарафону «Сагрэем дзіцячыя сэрцы», які пройдзе ў прамым эфіры абласнога канала 17 снежня. Пра гэта расказала рэдактар і вядучая тэлемарафона Ірына Бардзілоўская.

«Гэта будзе ўжо сёмы тэлемарафон. Штогод падрыхтоўка да гэтага дня пачынаецца за месяц-паўтара. У гэты час ідзе здымка сюжэтаў пра тых дзяцей, якія больш за іншых маюць патрэбу ў дапамозе і ўвазе. Хтосьці просіць у падарунак сукенку прынцэсы, хтосьці цацку, а камусьці патрэбна інвалідная каляска. Гэта дзеткі са шматдзетных і прыёмных сем’яў, якія знаходзяцца ў дамах дзіцяці і спецыялізаваных установах або маюць сур’ёзныя праблемы са здароўем. І да дапамогі ім падключаецца ўся Магілёўская вобласць: арганізацыі і прадпрыемствы, грамадскія аб’яднанні, жыхары рэгіёна і прадстаўнікі бізнесу», – расказала Ірына Бардзілоўская.

Тэлемарафон ідзе ў прамым эфіры на працягу 6 гадзін. У студыю запрашаюць гасцей – сёлета іх будзе больш за паўсотню. «Працаваць падчас тэлемарафону бывае складана: разам з гасцямі мы глядзім відэасюжэты, а гісторыі ў іх бываюць сумнымі. Таму што часта гэта дзеці са складанымі дыягназамі. І бывае так, што сям’я распадаецца праз гэта, хто-небудзь з бацькоў не вытрымлівае. Часцей з дзіцем застаецца мама. І калі глядзіш на такіх людзей, заўсёды захапляешся іх сілай духу, аптымізмам. Яны – сапраўдныя героі. І хочацца пра іх расказаць, паказаць іх, дапамагчы, – адзначыла рэдактар. – Добрыя справы ў рэгіёне не замыкаюцца толькі на навагоднія і калядныя святы. Пра гэта мы таксама гаворым падчас эфіру, паказваем сюжэты. Людзі павінны разумець, што рабіць добрыя справы – нескладана і не страшна».

Далучаюцца да дапамогі дзецям і звычайныя грамадзяне. «На працягу месяца ў эфіры розных нашых праграм мы паказваем сюжэты пра дзяцей. І вось у мінулым годзе была гісторыя, калі я і іншы вядучы, Канстанцін Тытаміраў, затрымаліся на працы, рыхтуючыся да тэлемарафону. І ўвечары зазваніў тэлефон. На тым канцы провада быў мужчына, які сказаў, што бачыў у вячэрніх навінах сюжэт пра дзіця і гатовы дапамагчы. Мы запрасілі яго на марафон, і яны з прыяцелем прыйшлі да нас у студыю і ажыццявілі мару маленькага героя нашага сюжэту», – адзначыла Ірына Бардзілоўская.

Кожны год сума збору на тэлемарафоне расце. «У мінулым годзе за 6,5 гадзін прамога эфіру мы сабралі больш за Br62 тыс. і, як заўважыла дырэктар Магілёўскага абласнога аддзялення Беларускага дзіцячага фонду Ірына Фісюк, мы змаглі дапамагчы ўсім дзецям, якія звярнуліся. З кожным годам гэтая лічба становіцца ўсё большай і большай. У гэтым заслуга многіх людзей. З 1 снежня працуюць кароткія нумары тэлефонаў, як мабільных, так і гарадскіх. Сума пералічэння невялікая, але не бывае маленькай дапамогі, – адзначыла рэдактар. – Самае класнае ў гэтым марафоне – гэта бачыць, як выздараўліваюць дзеці. Неяк у нас была гісторыя, калі дзяўчынка неспадзявана выпіла чысцільны сродак і спаліла страўнік. Ёй патрэбна была аперацыя, і дзякуючы тэлемарафону мы змаглі сабраць неабходную суму: да дапамогі падключыліся работнікі «Магілёўхімвалакна». І праз год мы ўбачылі зусім іншую дзяўчынку – зусім звычайную і практычна здаровую. Вядома, ёй неабходная была рэабілітацыя, прэпараты для падтрымання. Але стан – не параўнаць. І ў такія моманты асабліва востра разумееш, што ўсё робіш недарэмна».

У мінулым годзе праз эпідсітуацыю маленькія госці не змаглі прыехаць у студыю – з імі размаўлялі ў рэжыме відэатрансляцыі. «Сёлета чакаем дзяцей у госці. Не ў такой вялікай колькасці, як звычайна, але дзеці прыедуць. Нішто не заменіць жывых зносін. Прыгожая студыя, шмат падарункаў і добрых слоў – эмоцыі, якія атрымліваеш падчас тэлемарафона, неацэнныя», – адзначыла Ірына Бардзілоўская.

Сёлета тэлемарафон на тэлеканале «Беларусь 4 Магілёў» пройдзе 17 снежня з 14.00 да 20.00.

БЕЛТА