«Камфортна як дома» - у Буйнічах пасля маштабнай рэканструкцыі адкрыўся абноўлены дзіцячы садок

Сапраўдным падарункам для жыхароў аграгарадка Буйнічы Магілёўскага раёна стаў абноўлены дзіцячы садок. Тут поўнасцю адрамантавалі фасады будынка, памянялі дах, сантэхніку і электрыку, абнавілі ўсю мэблю. Пакуль у такіх камфортных умовах будуць знаходзіцца 15 хлопчыкаў і дзяўчынак, праектная магутнасць садка разлічана на 25 чалавек.

Будынак 50-х гадоў пабудовы сапраўды патрабаваў рэнавацыі. Летась жыхары аграгарадка звярнуліся на прыём грамадзян да старшыні Магілёўскага аблвыканкама Анатоля Ісачанкі з просьбай прывесці ў парадак установу адукацыі. З абласнога бюджэту былі выдзелены сродкі на яго рэканструкцыю. Сёння, 7 лістапада, дзеці і іх бацькі радуюцца наваселлю, бо садок сапраўды як новы. Шматдзетная маці Аляксандра Вульвач выхоўвае чацвёра дзяцей, і трое з іх хадзілі ў гэты дзіцячы садок, зараз пойдзе трохгадовы Дзіма:

- Мы з сям'ёй жывем у Буйнічах з 2016 года, пераехалі ў аграгарадок з Магілёва. Калі паўстала пытанне, куды аддаваць рабят, выбралі тое, што бліжэй да дома. Для шматдзетнай сям'і гэта выратаванне. Будынак прыкладна 50-х гадоў пабудовы быў камфортным, але рамонт, вядома, быў неабходзен. У мінулым годзе нас закрылі на рэканструкцыю. У гэты перыяд вазілі дзяцей у Магілёў. А сёння мы нарэшце вяртаемся ў родную дашкольную ўстанову. Вельмі задаволены! Нам падабаецца, што дзеці будуць у камфортных і сучасных умовах - прастор, новая мэбля і цацкі. Упэўненыя, што тут будзе панаваць любоў і ўтульнасць. Садок вельмі маленькі і больш нагадвае сямейны, дзеці тут як дома. Усё спрыяе таму, каб рабяты пачуваліся камфортна. У гэтым дзіцячым садку вырасла тры пакаленні дзяцей, і, спадзяюся, будзе яшчэ столькі ж.

Вераніка Брутава павядзе ў абноўлены дзіцячы садок чатырохгадовага сына Сямёна. Заўважае, што ўмовы ў ім сапраўды камфортныя:

- Любыя бацькі былі б рады такім умовам, якія створаны ў гэтым садзе. Мы вельмі задаволены працай калектыва, дзеці сябе адчуваюць тут утульна. Цяпер, калі сад стаў такім прыгожым і сучасным, нам удвая прыемней. Мы як бацькі спакойныя душой, што нашым дзецям тут падабаецца. У нашым аграгарадку створаны ўсе ўмовы, каб жыць і гадаваць дзяцей. У свой час мы з сям’ёй жылі ў інтэрнаце і стаялі на чарзе па паляпшэнні жыллёвых умоў. Але кватэру ніколі не разглядалі, заўсёды хацелі жыць у сваёй хаце, самі ж вясковыя. Гэта больш камфортна і для нас саміх, і для нашых траіх дзяцей. Буйнічы - вельмі ўтульны аграгарадок, тут усё ў крокавай даступнасці, а мітусні менш.

На рэканструкцыю дзіцячага сада накіравана 760 тысяч рублёў. Капрамонт доўжыўся з 2024 да 2025 года. Пад замену пайшлі сцены і дах будынка, унутраныя камунікацыі, добраўпарадкавана тэрыторыя, расказала начальнік аддзела па адукацыі Магілёўскага райвыканкама Наталля Колас:

— У аграгарадку функцыянуе два дзіцячыя садкі: адкрыты пасля рэканструкцыі на 25 месцаў і другі на 110 месцаў. Для таго каб людзі ў сельскай мясцовасці заставаліся і адчувалі сябе камфортна, неабходна развіваць інфраструктуру. Таму будаўніцтва дзіцячага сада - прыклад такога клопату дзяржавы. Тут ёсць магчымасць жыць, гадаваць і вучыць дзяцей.

Адкрыццё такіх дашкольных устаноў - частка праграмы сацыяльнай палітыкі дзяржавы, упэўнены старшыня Магілёўскага райвыканкама Дзмітрый Мудрагелаў:

— Такія сацыяльныя аб'екты не проста важныя, яны дазваляюць замацаваць людзей у сельскай мясцовасці, стварыць тое самае спрыяльнае асяроддзе для нашых грамадзян. Яшчэ ў верасні мінулага года шматдзетныя сем'і звярнуліся на прыём грамадзян да старшыні Магілёўскага аблвыканкама з просьбай дапамагчы правесці капітальны рамонт дзіцячага сада, да якога прызвычаіліся людзі. Па сутнасці, за год быў пабудаваны фактычна новы дзіцячы садок, ён сёння не проста добраўпарадкаваны, забяспечвае самыя сучасныя і спрыяльныя ўмовы для таго, каб дзеці выхоўваліся і атрымлівалі ўсё неабходнае.

У Магілёўскім раёне працуюць 16 дашкольных устаноў адукацыі, іх наведвае каля тысячы дзяцей. Акрамя рэканструяванага саду ў Буйнічах, сёлета быў адкрыты дзіцячы садок у аграгарадку Палыкавічы на 75 месцаў.

СБ