Кругласутачна на прыёмцы збожжа новага ўраджаю працуе Горацкі элеватар

Кругласутачна, у тры змены, працуе сёння камунальнае ўнітарнае прадпрыемства «Горацкі элеватар» на прыёмцы сёлетняга ўраджаю збожжа. Для гэтага задзейнічана шэсць вытворчых пунктаў. За суткі на іх разгружаецца да 180 грузавых аўтамабіляў, якія дастаўляюць з сельскагаспадарчых арганізацый у горацкія засекі 4-5 тыс. тон збожжа.

Да сённяшняй прыёмкі хлеба тут, па словах начальніка элеватара Віталя Халанькова, як заўсёды, скрупулёзна падрыхтаваліся. У прыватнасці, удасканалілі транспарцёрныя лініі. Вытворчыя магутнасці прадпрыемства папоўніліся сепаратарам для ачысткі збожжа любых сельскагаспадарчых культур, што істотна скараціла энергазатраты па яго сушцы. У працэсе дапрацоўкі збожжа задзейнічалі таксама тры сушыльныя агрэгаты: два для прасушвання збожжа і адзін – масласямян рапсу.

Мадэрнізаваная на Горацкім элеватары і працэдура адбору пробаў збожжа, для чаго тут прымяняецца сучасны механічны адборнік, кіруецца з дапамогай джойсціка з вытворча-тэхнічнай лабараторыі прадпрыемства. Яго ўстаноўка дазволіла вырабляць гэту працэдуру з дзвюх аўтамабільных ліній адначасова. У выніку значна скараціўся час для адбору пробаў збожжа (да 20 секунд знаходжання грузавіка пад пробаадборнікам).

Што ж тычыцца самога збожжа, якое паступае зараз у Горацкія засекі, то, па сцвярджэнні начальніка вытворча-тэхнічнай лабараторыі Горацкага элеватара Таццяны Гаўрылавай, яго якасць сёння нядрэнная. Ёсць, праўда, некаторае перавышэнне параметраў вільготнасці, але сітуацыя з ёю выпраўляецца ў ходзе дапрацоўкі збожжа.

mogilevnews.by