Рус Бел Eng 中文

Магілёўшчына 26-27 чэрвеня сустрэне ўдзельнікаў міжнароднага аўтапрабегу ДТСААФ Беларусі і Расіі

Міжнародны аўтапрабег, прысвечаны 75-годдзю вызвалення Беларусі ад нямецка-фашысцкіх захопнікаў, пройдзе па маршруце Масква – Брэст. Яго арганізатарамі выступаюць ДТСААФ Беларусі і Расіі, паведаміў вядучы спецыяліст Магілёўскай абласной арганізацыйнай структуры ДТСААФ Віктар Шупранаў.

Са слоў суразмоўцы, калона стартавала 20 чэрвеня ў Маскве на Паклоннай гары. За чатыры дні яна праехала праз расійскія Падзікава, Валакаламск, Толсцікава, Гагарын, Барадзіно, Жукаў, Малаяраславец, Калугу і Бранск.

Сёння аўтапрабег сустрэла Беларусь. «Сімвалічна, што па тэрыторыі нашай краіны ён пачаў рух з гарадскога пасёлка Камарын Брагінскага раёна Гомельскай вобласці, – адзначылі суразмоўцы. – Менавіта гэты населены пункт быў першым вызвалены савецкімі войскамі ў 1943 годзе ад нямецка-фашысцкіх захопнікаў». Далей калона пройдзе па Лоеве, Гомелі, Жлобіне і Рагачове.

Магілёўшчына прыме ўдзельнікаў міжнароднага аўтапрабегу ДТСААФ Беларусі і Расіі 26 чэрвеня. Першым на шляху следавання стане Бабруйск. Тут на плошчы Перамогі ў 11.15 пачнецца ўрачысты мітынг з ускладаннем кветак і вянкоў. Затым адбудзецца перадача эстафеты Прыдняпроўскаму краю і сустрэча з ветэранамі і моладдзю.

У 15.00 запланаваны прыпынак на мемарыяльным комплексе «Усакіна» Клічаўскага раёна. Пасля ўскладання гірлянды і кветак прысутным прапануюць наведаць з экскурсіяй мемарыял і паглядзець рэканструкцыю падзей Вялікай Айчыннай вайны «Прарыў блакады “Адлер”».

На наступны дзень, 27 чэрвеня, аўтапрабег прыбудзе ў Магілёў. На тэрыторыі мемарыяльнага комплексу ў памяць аб загінулых у канцлагеры савецкіх ваеннапалонных і мірных грамадзянах (пр. Шміта) у 10.00 пачнецца ўрачысты мітынг з ускладаннем кветак і вянкоў.

Па заканчэнні мерапрыемства калона рушыць у бок населенага пункта Заброддзе, дзе адбудзецца перадача эстафеты Віцебскай вобласці. Далей маршрут аўтапрабегу будзе пралягаць праз Оршу, Барысаў, Мінск, Баранавічы, Івацэвічы, Бярозу, Кобрын і Брэст. Фінішуе калона каля сцен Брэсцкай крэпасці-героя 30 чэрвеня.

Аўтапрабег праводзіцца з мэтай умацавання дружбы паміж брацкімі народамі Расіі і Беларусі, садзейнічання захаванню памяці аб подзвігу савецкага народа ў гады Вялікай Айчыннай вайны і выхавання моладзі на ратных традыцыях, супрацьдзеяння фальсіфікацыі гісторыі.

Пры выкарыстанні матэрыялаў актыўная гіперспасылка на mogilev-region.gov.by абавязковая