Магілёўская епархія і рэгіянальны цэнтр паліятыўнай дапамогі рэалізуюць сумесны праект: патрэбныя добраахвотнікі

У абласным цэнтры на базе Трохсвяціцельскага сабора пачынае працу новы сумесны праект Магілёўскай епархіі і рэгіянальнага цэнтра паліятыўнай дапамогі, размешчанага на базе УАЗ «Магілёўскі спецыялізаваны Дом дзіцяці для дзяцей з арганічным паражэннем цэнтральнай нервовай сістэмы з парушэннем псіхікі». Далучыцца да добрай справы могуць усе жадаючыя, паведамляецца на сайце Магілёўскай епархіі.

Адзін з напрамкаў праекта – аўтаваланцёрства. Тут неабходныя добраахвотнікі, якія маюць магчымасць і жаданне падвозіць дзяцей-інвалідаў у храм на набажэнства і для заняткаў у нядзельнай школе. Таксама патрэбныя валанцёры для зносін па дзвюх падгрупах. Першая – замацаваныя за пэўнай сям’ёй два-тры чалавекі, якія наведваюць дзяцей-інвалідаў дома. Другая – валанцёры (імі могуць быць музыканты, мастакі, аніматары і проста спагадлівыя людзі), гатовыя, па меры магчымасці, прыйсці і пагуляць з дзеткамі, якіх мамы часам пакідаюць на некалькі гадзін або на дзень у цэнтры. Такі адпачынак для мам хворых дзетак называецца сацыяльная перадышка.

Каардынатарамі праекта з’яўляюцца:

ад епархіі – іерэй Уладзімір (Котаў), +375 29 642 56 73 (Vel), +375 29 742 56 73 (МТС);

ад цэнтра паліятыўнай дапамогі – псіхолаг Цалуйка Алеся Уладзіміраўна, +375 33 317 04 14 (МТС).