Магілёўская і Сагдыйская вобласці маюць намер умацоўваць дзелавое ўзаемадзеянне прадпрыемстваў

Надзвычайны і Паўнамоцны Пасол Рэспублікі Беларусь у Рэспубліцы Таджыкістан Віктар Дзенісенка 1-3 снежня наведвае Сагдыйскую вобласць Таджыкістана. Пра гэта паведамілі ў пасольстве нашай краіны ў Таджыкістане.

Віктар Дзенісенка 2 снежня прыняў удзел у сустрэчы дэлегацыі Магілёўскай вобласці са старшынёй выканаўчага органа дзяржаўнай улады Сагдыйскай вобласці Раджабоем Ахмадзада. Бакі абмеркавалі пытанні развіцця гандлёва-эканамічнага супрацоўніцтва Магілёўскай і Сагдыйскай абласцей, а таксама ў цэлым перспектывы ўмацавання дзелавога ўзаемадзеяння прадпрыемстваў дзвюх краін, у тым ліку ў сферы прамысловай кааперацыі.

Праграмай візіту запланаваны ўдзел пасла ў таджыкска-беларускім бізнес-форуме, наведванне прадпрыемстваў Сагдыйскай вобласці, сустрэчы з ключавымі дзелавымі партнёрамі беларускіх экспарцёраў.

У пасольстве таксама праінфармавалі, што 1-4 снежня праходзіць візіт у Сагдыйскую вобласць беларускай дэлегацыі на чале з намеснікам старшыні Магілёўскага абласнога выканаўчага камітэта Русланам Страхарам.

БЕЛТА