На пасяджэнні калегіі КДК Магілёўскай вобласці падвялі вынікі працы за 2018 год

На пасяджэнні калегіі Камітэта дзяржаўнага кантролю Магілёўскай вобласці разгледжаны вынікі працы за 2018 год і вызначаны задачы на найбліжэйшую перспектыву. Пра гэта паведаміў старшыня кантралюючага ведамства Алег Садоўскі.

«Асноўныя намаганні камітэта былі сканцэнтраваны на арганізацыі прафілактыкі правапарушэнняў, кантролі за эфектыўным выкарыстаннем бюджэтных сродкаў і дзяржмаёмасці, выяўленні рэзерваў павышэння эфектыўнасці дзейнасці галін эканомікі вобласці, выпрацоўцы прапаноў па ўдасканаленні заканадаўства», – адзначыў ён.

У мінулым годзе дзяржаўнымі кантралёрамі праведзена амаль у 2 разы менш праверак, чым у 2017 годзе. Пры гэтым удалося павялічыць іх выніковасць. У бюджэт спагнана Br6,9 млн., кампенсавана сродкаў дзяржарганізацыям у памеры Br13,2 млн., даналічана падаткаў (збораў) – Br4,8 млн.

Паводле матэрыялаў камітэта распачата 75 крымінальных спраў, з іх 40 – па выніках сумеснай работы з УДФР КДК Рэспублікі Беларусь па Магілёўскай вобласці. Паводле вынікаў кантрольна-аналітычных мерапрыемстваў ад займаемых пасадаў вызвалена 13 службовых асоб, да адміністрацыйнай адказнасці прыцягнута 601.

Адным з асноўных напрамкаў дзейнасці ведамства з’яўляўся папераджальны кантроль за выкананнем даручэнняў кіраўніка дзяржавы, дзяржаўных, рэгіянальных і галіновых праграм. У гэтых мэтах на калегіі разгледжана 51 тэматычнае пытанне, выпрацаваны канкрэтныя прапановы дзяржаўным органам і суб’ектам гаспадарання.

На пастаяннай аснове ў камітэце былі арганізаваны маніторынгі і аўдыты эфектыўнасці найбольш важных сфер сацыяльна-эканамічнага развіцця вобласці, паводле вынікаў якіх адпаведныя прапановы накіроўваліся ў мясцовыя органы ўлады, дзяржорганы і арганізацыі для прыняцця мер. Праводзілася работа па прафілактыцы правапарушэнняў, у тым ліку праз СМІ. Важнае месца адводзілася рабоце са зваротамі грамадзян. Працягвалася практыка правядзення сумесных асабістых прыёмаў і прамых тэлефонных ліній старшынёй камітэта з пракурорам вобласці. Па выніках кантролю і разгляду зваротаў да адміністрацыйнай адказнасці прыцягнуты 3 службовыя асобы, да дысцыплінарнай – 20, з іх 2 вызвалены ад займаемых пасадаў, праваахоўнымі органамі ўзбуджана 2 крымінальныя справы.

«У бягучым годзе Камітэт працягне кантроль за выкананнем мясцовых бюджэтаў, выкарыстаннем дзяржуласнасці, рэалізацыяй найважнейшых інвестыцыйных і інавацыйных праектаў, ходам правядзення мадэрнізацыі валаўтваральных і горадаўтваральных прадпрыемстваў, захаваннем зямельнага, ляснога і прыродаахоўнага заканадаўстваў, заканадаўства ў сферы дзяржзакупак. Працягнецца маніторынг сітуацыі ў будаўнічым комплексе і ЖКГ, на рынку працы і іншых галінах», – падкрэсліў Алег Садоўскі.