На «Сцежку здароўя» ў Магілёве выйдзе каля 20 каманд ветэранаў

Традыцыйнае спартыўнае свята «Сцежка здароўя» збярэ ў Магілёве амаль 20 каманд ветэранаў. Пра гэта карэспандэнту расказала старшыня Магілёўскага гарадскога савета ветэранаў Зінаіда Пянькова.

Спіс каманд удзельнікаў ужо вызначыўся. «Сёлета ўдзельнікамі «Сцежкі здароўя» стане 16 каманд – па 8 з Кастрычніцкага і Ленінскага раёнаў горада. У кожнай камандзе будзе па 10 удзельнікаў», – сказала яна.

Мерапрыемства пройдзе каля стадыёна «Тарпеда». Перад пачаткам спаборніцтваў каманды змогуць пазнаёміцца адна з адной, з судзейскай калегіяй, арганізатарамі і гасцямі. Акрамя гэтага, кожная каманда павінна падрыхтаваць арыгінальнае прывітанне і па магчымасці аднолькавую форму для ўдзельнікаў або адметныя эмблемы. Пасля гэтага ўдзельнікі адправяцца на спартыўныя выпрабаванні. Ветэраны Магілёва паспаборнічаюць у стральбе з пнеўматычнай вінтоўкі, праявяць трапнасць у дартсе, карнхоле, боўлінгу і іншых спартыўных гульнях, а таксама выпрабуюць сябе ў вясёлай рыбалцы.

Праводзіцца мерапрыемства будзе на свежым паветры. Яно прымеркавана да Дня пажылога чалавека і праходзіць у Магілёве штогод. «Нашы ветэраны заўсёды чакаюць гэта свята і актыўна прымаюць у ім удзел. Гэта добрая магчымасць правесці час на свежым паветры, паўдзельнічаць у актыўных і спартыўных гульнях, пагутарыць з ужо знаёмымі людзьмі і пазнаёміцца з кімсьці новым», – падкрэсліла Зінаіда Пянькова.

Акрамя спартыўных спаборніцтваў, удзельнікі і пераможцы атрымаюць памятныя дыпломы, арганізатары падрыхтавалі забаўляльную праграму. Пакуль будуць падводзіць вынікі спартыўнага свята, для ветэранаў і гасцей пройдзе творчы канцэрт. Акрамя гэтага, кожны жадаючы зможа пачаставацца карысным фітачаем і салдацкай кашай.

Спартыўнае свята пройдзе 27 верасня. Пачатак а 11.00.

БЕЛТА