«Праца ў міліцыі цікавіць моладзь». Больш за 750 школьнікаў рэгіёну сабраліся на прафарыентацыйным занятку ў Магілёве

Прафарыентацыйны занятак для школьнікаў рэгіёну «Святая справа - Радзіме служыць» прайшоў у Магілёве на базе АМАП УУС Магілёўскага аблвыканкама, паведамілі ў абласным ведамстве.

Як расказалі ва УУС, такая патрыятычная акцыя праводзіцца па ініцыятыве кіраўніцтва ўпраўлення ўнутраных спраў у гэтым месцы другі раз. У гэтым годзе яна атрымалася нашмат маштабней. Рабят не напалохаў нават моцны снегапад - у Магілёве сабраліся больш за 750 навучэнцаў розных узростаў з устаноў адукацыі горада і раёнаў вобласці. На базу прыехалі і выхаванцы касцюковіцкага ваенна-патрыятычнага клуба «Зубр», навучэнцы абласнога кадэцкага вучылішча імя Героя Савецкага Саюза Я. Нікалаенка, прадстаўнікі профільнага юрыдычнага класа магілёўскай гімназіі №3. Моладзь суправаджалі намеснікі начальнікаў па ідэалагічнай рабоце і кадравым забеспячэнні райаддзелаў міліцыі, педагогі, куратары і бацькі.

У час адкрыцця мерапрыемства з прывітальным словам да школьнікаў звярнуўся намеснік начальніка УУС Магілёўскага аблвыканкама палкоўнік міліцыі Сяргей Красноў. «Прыемна, што нашае прафарыентацыйнае мерапрыемства наведала так шмат старшакласнікаў. Гэта сведчыць аб тым, што праца ў міліцыі цікавая моладзі. Сённяшняе мерапрыемства ўмацуе пачуццё патрыятызму, а таксама дапаможа вызначыцца ў выбары прафесіі супрацоўніка органаў унутраных спраў», - сказаў ён.

Словы прывітання і пажаданні прысутным адрасаваў і камандзір атрада міліцыі асаблівага прызначэння УУС Магілёўскага аблвыканкама палкоўнік міліцыі Мікалай Гарэлікаў.

Для падлеткаў падрыхтавалі паказальнае выступленне АМАПу. З захапленнем рабяты назіралі за выкананнем службовымі сабакамі асноўных каманд агульнага курса падрыхтоўкі, а таксама за дэманстрацыяй затрымання ўмоўнага злачынца. Таксама школьнікі змаглі пазнаёміцца з навінкамі спецтэхнікі і ўзбраення АМАП і ДАІ УУС, прынялі ўдзел у некалькіх спартыўных конкурсах, а пасля падсілкаваліся гарачай салдацкай кашай. Усе жадаючыя змаглі даведацца пра сакрэты паспяховага паступлення ў акадэмію і Інстытут МУС, а таксама прыёму на службу ў органы ўнутраных спраў.

У завяршэнні прафарыентацыйнай акцыі прайшла цырымонія ўзнагароджання. Удзельнікі, якія прадэманстравалі лепшыя вынікі ў стральбе з пнеўматыкі, разборцы аўтамата Калашнікава і падцягванні, былі ўзнагароджаны дыпломамі і каштоўнымі падарункамі.

БЕЛТА