Прафілактычная акцыя «Дзень бяспекі. Увага ўсім!» пройдзе ў сакавіку ў Магілёўскай вобласці

Рэспубліканская прафілактычная акцыя «Дзень бяспекі. Увага ўсім!», прысвечаная Сусветнаму дню грамадзянскай абароны, пройдзе ў сакавіку ў Магілёўскай вобласці. Пра гэта карэспандэнту сайта паведаміла старшы інспектар Цэнтра бяспекі жыццядзейнасці і ўзаемадзеяння з грамадскасцю абласнога ўпраўлення МНС Вольга Нехарошых.

«Праблема абароны насельніцтва ў выпадку ўзнікнення надзвычайнай сітуацыі заслугоўвае асаблівай увагі, – распавяла суразмоўца. – НС – гэта заўсёды рэальная пагроза жыццю і здароўю людзей. Таму ў рэгіёне арганізавана мерапрыемства з мэтай фарміравання культуры бяспекі жыццядзейнасці».

Акцыя пройдзе ў 2 этапы. Падчас першага – з 11 па 20 сакавіка – мэтавай аўдыторыяй стануць бацькі і іх дзеці. Ратавальнікі адправяцца ў дзіцячыя і гандлёва-забаўляльныя цэнтры, спартыўныя аб’екты, кінатэатры і інш. Тут запланавана праца інтэрактыўных пляцовак і зон актывацыі, а таксама мерапрыемствы ў межах 2-га этапу іміджавай кампаніі «Правядзі час з карысцю», накіраванай на матывацыю бацькоў і дзяцей навучанню правілам бяспекі.

«Не застануцца без увагі і ўстановы адукацыі, – адзначыла Вольга Нехарошых. – напярэдадні канікул з навучэнцамі будзе арганізавана прафілактычная праца, якая ўключае ў сябе тэматычны «Урок бяспекі» і квэст-гульню «Надзвычайная сітуацыя»».

З 21 па 31 сакавіка ў рэгіёне адбудзецца другі этап акцыі. На адкрытых пляцоўках двароў і сельскіх населеных пунктаў супрацоўнікі МНС будуць размаўляць з пенсіянерамі, адзінокапражывальнымі і беспрацоўнымі грамадзянамі, мясцовымі жыхарамі. Фармат мерапрыемстваў насычаны і крэатыўны: «Бяспечная вёска», «Кірмашы бяспекі», квэст-гульні, а таксама тэматычныя дыскатэкі «Каму за... ».

«Прымайце ўдзел у акцыі «Дзень бяспекі. Увага ўсім!», і, акрамя станоўчых эмоцый, добрага настрою і прыемных прызавых бонусаў, вы атрымаеце так неабходныя і дзецям, і дарослым веды па бяспецы жыццядзейнасці», – падкрэсліла Вольга Нехарошых.