«Рабіць жыццё гараджан лепш, а горад прыгажэй». Новы кіраўнік Магілёва аб сваіх задачах

Магілёў добра і дынамічна развіваўся ўсе апошнія гады, але спыняцца на дасягнутым нельга. Такой думкай з журналістамі падзяліўся новы старшыня Магілёўскага гарвыканкама Сяргей Чарткоў пасля свайго зацвярджэння на пасадзе.

«Магілёў добра і дынамічна развіваўся ўсе апошнія гады, і гэта ацаніў кіраўнік дзяржавы, - падкрэсліў Сяргей Чарткоў. - Вядома, спыняцца нельга, трэба рухацца далей, бо задач вельмі шмат. Як сказаў Прэзідэнт, трэба падцягнуць горад да ўзроўню іншых абласных цэнтраў. Трэба працягваць добраўпарадкаванне набярэжных Дняпра і Дубравенкі і капітальны рамонт дарог, пашыраць наш цудоўны парк Паднікольле, уводзіць інфраструктурныя аб'екты, прыцягваць інвестыцыі - увогуле, рабіць жыццё нашых гараджан лепшым, а горад прыгажэйшым».

Новы старшыня гарвыканкама Сяргей Чарткоў зацверджаны на пасадзе 31 сакавіка на пазачарговай сесіі Магілёўскага гарадскога Савета дэпутатаў, яго прызначэнне было ўзгоднена 27 сакавіка кіраўніком дзяржавы. Калектыву гарадскога выканаўчага камітэта новага кіраўніка прадставіў старшыня Магілёўскага аблвыканкама Анатоль Ісачанка. Ён падкрэсліў, што Сяргей Чарткоў зарэкамендаваў сябе высокакваліфікаваным, мэтанакіраваным і патрабавальным кіраўніком.

Сяргей Чарткоў нарадзіўся ў 1976 годзе ў Магілёве. У 1998-м ён скончыў Магілёўскі машынабудаўнічы інстытут (цяпер Беларуска-Расійскі ўніверсітэт) па спецыяльнасці «тэхналогія машынабудавання, металарэжучыя станкі і інструменты». У гэтым жа годзе ён пачаў працаваць эканамістам-мэнэджэрам на заводзе транспартнага машынабудавання «Магілёўтрансмаш», дзе прайшоў працоўны шлях да начальніка ўпраўлення маркетынгу і збыту. У 2000 годзе прайшоў перападрыхтоўку ў Акадэміі кіравання пры Прэзідэнце па спецыяльнасці «эканоміка і кіраванне на прадпрыемстве». Прафесійная дзейнасць Сяргея Чарткова працягнулася на Магілёўскім заводзе ліфтавага машынабудавання, дзе ён працаваў з 2005 года, у тым ліку апошнія пяць гадоў - на пасадзе генеральнага дырэктара.

БЕЛТА