Рэйдавыя групы ДПС «Страла» адпрацуюць Магілёўскую вобласць

Рэйдавыя групы спецыяльнага падраздзялення ДПС «Страла» МУС накіраваны на адпрацоўку Магілёўскай вобласці, паведамілі ва УДАІ МУС Беларусі.

Для арганізацыі бяспекі дарожнага руху ў пятніцу і выхадныя Дзяржаўтаінспекцыя надасць павышаную ўвагу спыненню грубых парушэнняў ПДР вадзіцелямі і пешаходамі. «Рэйдавыя групы спецыяльнага падраздзялення ДПС «Страла» МУС накіраваны на адпрацоўку Магілёўскай вобласці, – праінфармавалі ў ДАІ. – У прыярытэце – выяўленне нецвярозых кіроўцаў, бяспраўнікаў. Не застануцца без увагі парушэнні правілаў абгону, праезду пешаходных пераходаў, перавышэння хуткасных рэжымаў, выпадкі няправільнай перавозкі пасажыраў. Адміністрацыйнай адказнасці не змогуць пазбегнуць таксама пешаходы і веласіпедысты, якія ігнаруюць патрабаванні правілаў дарожнага руху».

У Дзяржаўтаінспекцыі адзначылі, што пешаход, як самы неабаронены ўдзельнік дарожнага руху, павінен заўсёды быць вельмі асцярожным і ўважлівым. Некаторыя сітуацыі не пад сілу прадбачыць нікому, але выконваць элементарныя патрабаванні бяспекі, каб засцерагчы сябе ад непрыемнасцяў на дарозе, у стане кожны. «Перасякаць праезджую частку варта выключна па пешаходным пераходзе. Пры гэтым варта пераканацца, што вадзіцелі заўважылі чалавека і паспелі спыніцца. Неабходна рухацца па тратуарах, пешаходных дарожках і толькі пры іх адсутнасці – па абочыне ці краі праезджай часткі, абавязкова насустрач транспартным сродкам. Пры гэтым у цёмны час сутак, а таксама ва ўмовах недастатковай бачнасці трэба абавязкова абазначыць сябе святлоадбівальнымі элементамі», – падкрэслілі ў ДАІ.

У сувязі з павелічэннем інтэнсіўнасці руху на выездах з гарадоў і загарадных дарогах ДАІ звяртае ўвагу вадзіцеляў, што ваджэнне ў шчыльным струмені патрабуе павышанай увагі, пастаяннага аналізу і прагназавання сітуацыі на дарозе. Неабходна выконваць хуткасныя абмежаванні, пазбягаць непатрэбных перастраенняў і апярэджанняў, выезду на сустрэчную паласу. Варта таксама прышпіліцца рамянямі бяспекі ўсім, хто сядзіць у аўтамабілі, дзяцей перавозіць з выкарыстаннем дзіцячых утрымлівальных прылад.

БЕЛТА