РІКВ: узровень складанасці ЦЭ і ЦТ па ўсіх прадметах у 2026 годзе не зменіцца

Узровень складанасці экзаменацыйных работ цэнтралізаванага экзамену і цэнтралізаванага тэсціравання па ўсіх вучэбных прадметах у 2026 годзе будзе такім жа, як і ў 2025-м. Аб гэтым паведаміў дырэктар Рэспубліканскага інстытута кантролю ведаў Дзмітрый Міронаў.

У пачатку лістапада зацверджана спецыфікацыя экзаменацыйнай (тэставай) работы для правядзення ЦЭ і ЦТ у 2026 годзе. Гэта дакумент, у якім вызначаецца структура і змест часткі А і часткі В тэставай работы, указваецца колькасць заданняў, іх тыпы і размеркаванне па ўзроўнях складанасці, а таксама пералік элементаў зместу вучэбнага прадмета і час выканання тэставай работы.

«Гэты дакумент штогод распрацоўваецца па кожным прадмеце на падставе навучальных праграм і праграм для ўступных іспытаў і зацвярджаецца міністрам адукацыі», - расказаў Дзмітрый Міронаў.

Ён адзначыў, што асноўная задача спецыфікацыі - даць дакладнае, поўнае апісанне праграмнага матэрыялу, раздзелаў, тэм, элементаў зместу па кожнай тэме, якія будуць прадстаўлены ў тэставай рабоце па прадмеце. «Напрыклад, дзякуючы спецыфікацыі па беларускай мове ўдзельнікі ЦЭ і ЦТ 2026 года ўжо сёння могуць азнаёміцца з тымі праграмнымі раздзеламі, якія ўвойдуць у тэст: «Маўленне. Тэкст. Стылістыка», «Фанетыка і арфаэпія. Арфаграфія», «Лексіка. Фразеалогія», «Марфемная будова слова. Словаўтварэнне і арфаграфія», «Марфалогія і арфаграфія», «Сінтаксіс і пунктуацыя». Важна адзначыць, што размеркаванне заданняў па ўзроўнях складанасці ў экзаменацыйнай рабоце, якая будзе прадастаўлена для праходжання ЦЭ і ЦТ у 2026 годзе, па ўсіх без выключэння прадметах у параўнанні з 2025 годам не зменіцца. Гэта значыць, што ўзровень складанасці экзаменацыйных работ па ўсіх вучэбных прадметах будзе такім жа, як і ў 2025 годзе», - падкрэсліў дырэктар РІКВ.

БЕЛТА