Рыбака, які праваліўся пад лёд, выратавалі ў Быхаўскім раёне

Адзін пажар у Бабруйску адбыўся за суткі ў вобласці. Таксама работнікі МНС выязджалі на выратаванне рыбака, які праваліўся пад лёд, у Быхаўскім раёне. Пра гэта паведаміла старшы інспектар абласнога ўпраўлення МНС Вольга Нехарошых.

У службу МНС 17 студзеня ў 11.38 патэлефанаваў усхваляваны гаспадар прыватнага жылога дома па вул. Сядова ў Бабруйску. Адбывалася гарэнне ў адным з пакояў, стварылася шчыльнае задымленне. Ратавальнікі не далі агню знішчыць жыллё: у выніку пажару знішчана маёмасць у пакоі, закураны сцены і столь у доме. Ніхто не пацярпеў. Прычына пажару высвятляецца. Спецыялісты не выключаюць, што ў тым, што адбылося, вінавата неасцярожнае абыходжанне з агнём пры курэнні.

Мясцовыя жыхары 17 студзеня а 17.01 паведамілі ў службу МНС, што ў рацэ Лахва каля вёскі Сарочына Быхаўскага раёна мужчына праваліўся пад лёд і просіць дапамогі. Ратавальнікі аператыўна прыбылі да месца выкліку: трымаючыся за кусты, у вадзе знаходзіўся 51-гадовы мясцовы жыхар. Работнікі МНС вызвалілі мужчыну з ледзянога палону і пры дапамозе выратавальнай дошкі даставілі на бераг. Выратаваны растлумачыў, што, вяртаючыся з рыбалкі, рухаючыся праз хмызняк, затоплены вадой, праваліўся пад лёд і самастойна выбрацца не мог. З дыягназам «агульнае пераахаладжэнне» ён шпіталізаваны.

Рэд.