Самыя папулярныя спецыяльнасці ў абітурыентаў назвалі ў БДСГА

Як пройдзе прыёмная кампанія ў Беларускай дзяржаўнай сельскагаспадарчай акадэміі, расказаў намеснік адказнага сакратара прыёмнай камісіі Сяргей Рубец.

«У гэтым годзе на дзённую форму мы будзем набіраць 760 студэнтаў, у тым ліку на мэтавую падрыхтоўку – 453 чалавекі, – адзначыў ён. - Мы прапануем абітурыентам 14 спецыяльнасцей як аграрнай, так і іншай накіраванасці».

У гэтым годзе не будзе набору на дзённую форму навучання па спецыяльнасцях «фінансы і крэдыт» і «камерцыя» - стаўка ў акадэміі робіцца на аграрныя спецыяльнасці. «Пры гэтым летась у нас асаблівую папулярнасць у абітурыентаў выклікала спецыяльнасць «землеўпарадкаванне і кадастры», у тым ліку і па мэтавай падрыхтоўцы. У гэтым годзе план па наборы на гэтую спецыялізацыю з 65 павялічыўся да 80. Павялічылася колькасць месцаў на спецыяльнасць «аграбізнес» - было 55, а стала 70. Павялічылася колькасць месцаў на «правазнаўства» - было 20, а стала 30», - адзначыў Сяргей Рубец.

Для абітурыентаў ёсць і прэферэнцыі. «Тыя, у каго ёсць дыплом з адзнакай па прафесійна-тэхнічнай, сярэдняй спецыяльнай адукацыі або атэстат асаблівага ўзору з узнагароджаннем залатым або сярэбраным медалём на ўсе спецыяльнасці, акрамя «правазнаўства», могуць паступіць без уступных іспытаў, - распавёў намеснік адказнага сакратара. - Акрамя таго, у нас ёсць восем сельскагаспадарчых спецыяльнасцяў, куды ідуць абітурыенты на ўмовах мэтавай падрыхтоўкі і таксама без уступных іспытаў».

Адмысловыя ўмовы дзейнічаюць і для выпускнікоў інжынерных ці агракласаў. «У цэлым у акадэміі створаны ўсе ўмовы, каб матываваныя і зацікаўленыя выпускнікі мелі магчымасць паступіць і атрымаць якасную адукацыю па выбранай спецыяльнасці», - адзначыў ён.

Прыём дакументаў на ўмовах мэтавай падрыхтоўкі будзе праходзіць з 27 чэрвеня па 2 ліпеня, з 12 па 17 ліпеня дакументы будуць прымаць на нясельскагаспадарчыя спецыяльнасці, па 19 ліпеня, на два дні даўжэй, - на спецыяльнасці сельскагаспадарчага профілю.

БЕЛТА