Шэсць пажараў, двое загінуўшых і двое пацярпелых - трагічныя вынікі выхадных у вобласці

Трагічнымі выдаліся выходныя ў вобласці: адбылося 6 пажараў у Быхаве, Бабруйску, Слаўгарадскім, Чавускім, Бабруйскім і Клімавіцкім раёнах. Загінулі два чалавекі, двое пацярпелі. Пра гэта паведаміла старшы інспектар абласнога ўпраўлення МНС Вольга Нехарошых.

Ахвярай агню 20 студзеня раніцай стаў 64-гадовы адзінока пражываючы жыхар в. Малая Зімніца Слаўгарадскага раёна. Палаючую хату знайшлі суседзі і патэлефанавалі ў службу 101. Пад канструкцыямі на падлозе ў адным з пакояў без прыкмет жыцця быў знойдзены гаспадар. Агонь практычна дашчэнту папяліў жыллё: знішчаны дах, перакрыцце і маёмасць у доме, пашкоджаны сцены. Прычына пажару высвятляецца. Разгляданая версія - неасцярожнае абыходжанне з агнём пры курэнні. Праверку па факце гібелі праводзіць Слаўгарадскі раённы аддзел следчага камітэта.

У гэты ж дзень 20 студзеня ў 09.24 паступіла паведамленне аб пажары прыватнага жылога дома ў в. Дракаўка Чавускага раёна. Адкрытага гарэння не назіралася, але ў выніку тлення падлогі і пасцельных прыналежнасцяў дом быў напоўнены з'едлівым дымам. На падлозе без прыкмет жыцця знойдзены 74-гадовы арандатар жылля. У выніку пажару пашкоджана 2 кв.м падлогі і пасцельныя прыналежнасці. Прычына здарэння высвятляецца.

Другі шанц на жыццё падарылі суседзі 59-гадоваму жыхару Быхава, які пражывае ў адной з кватэр трохпавярховага жылога дома па вул. Грышына. Па ўсёй верагоднасці, мужчына перад сном пакурыў у ванным пакоі і не патушыўшы недакурак выкінуў яго ў смеццевае вядро. Пах дыму адчуў 35-гадовы сусед - Аляксандр Бабакоў. Ведаючы, што ў агністай пастцы знаходзіцца гаспадар, ён паспяшаўся на дапамогу і выцягнуў яго з задымленай кватэры. Разам з іншымі суседзямі яны аказалі пацярпеламу першую медыцынскую дапамогу. Выратаваны шпіталізаваны. У выніку пажару пашкоджана 1,5 кв.м аздаблення сцяны ваннага пакоя і маёмасць.

Знішчаны дах па ўсёй плошчы, часткова перакрыцце, абвугленыя сцены, знішчаная маёмасць у доме і шпіталізацыя ў рэанімацыйнае аддзяленне 64-гадовага гаспадара - такія наступствы пажару прыватнага жылога дома па вул. Кірава ў Бабруйску, які адбыўся 23 студзеня каля 4 гадзін раніцы. Прычына пажару высвятляецца.

22 студзеня ў 16.24 паступіла паведамленне аб спрацоўванні сігналізацыі «Маланка» ў пакоі на восьмым паверсе дзевяціпавярховага будынка інтэрната па вул. Ульянаўскай у Бабруйску. Праз 4 хвіліны ратавальнікі прыбылі да месца выкліку - з акна восьмага паверха ішоў дым. Гарэў ложак у блоку, у якім пражывае 22-гадовая бабруйчанка разам з мужам і двума дзецьмі 2017 і 2018 г.н. На момант пажару жанчына з 4-гадовым сынам адсутнічалі. У блоку знаходзіўся яе муж з 5-гадовай дачкой. Выявіўшы гарэнне, мужчына, паведаміўшы аб пажары суседзям, эвакуіраваўся разам з дачкой. Яны не пацярпелі. У выніку пажару ў пакоі пашкоджана маёмасць, закураны сцены і столь. Работнікамі МНС з 8-га паверха эвакуіравалі 14 чалавек, з іх 3 дзяцей. Ніхто не пацярпеў. Прычына здарэння высвятляецца.

Рэд.