Старшыня аблвыканкама Леанід Заяц напярэдадні Дня Перамогі наведаў шпіталь інвалідаў Айчыннай вайны

Старшыня Магілёўскага аблвыканкама Леанід Заяц сёння наведаў Магілёўскі абласны шпіталь інвалідаў Айчыннай вайны.

Адкрываючы ўрачыстае мерапрыемства, прысвечанае 9 Мая, кіраўнік рэгіёна адзначыў, што няма больш свяшчэннага дня ў гісторыі нашай дзяржавы, чым Дзень Перамогі, які з’яўляецца сімвалам гераізму і подзвігу. Аднак перамога ў Вялікай Айчыннай вайне дасталася савецкаму народу цаной велізарных страт: афіцыйна колькасць загінулых чырвонаармейцаў і мірных грамадзян, якія памерлі ад ран, голаду і хвароб, складае звыш 27 млн. чалавек.

Крывёю палітая і беларуская зямля, якая прадэманстравала свету беспрэцэдэнтныя прыклады мужнасці, падкрэсліў Леанід Заяц. Гэта гераічная абарона Брэсцкай крэпасці ў 1941 годзе, якая наглядна паказала гітлераўцам, з якім праціўнікам яны сутыкнуліся; абарона Магілёва, якая працягвалася доўгія 23 дні і дапамагла выйграць час для мабілізацыі сіл на адпор ворагу; аперацыя «Баграціён», якая паклала пачатак заключнага этапу вызвалення Беларусі ад нямецка-фашысцкіх захопнікаў.

«Немагчыма забыць тое, што перажыў наш народ, – канстатаваў старшыня аблвыканкама. – Цалкам разбуранымі і разрабаванымі лічацца 209 з 270 гарадоў. 5454 вёскі было знішчана. Загінуў кожны трэці жыхар Беларусі. Светлая памяць тым, хто не дажыў да гэтых дзён. Мы схіляемся перад іх подзвігам і мужнасцю. Велізарная ўдзячнасць ветэранам, якія годна, з гонарам абаранілі свабоду і незалежнасць нашай Радзімы, падарылі нам мірнае жыццё, паднялі з руін і попелу нашы гарады, вёскі, выгадавалі дзяцей і ўнукаў. Працоўнымі справамі і здзяйсненнямі мы будзем шанаваць памяць нашых бацькоў і дзядоў».

Леанід Заяц цёпла павіншаваў удзельнікаў мерапрыемства са святам і ўручыў у падарунак ад аблвыканкама шпіталю сертыфікат на набыццё сучаснага медыцынскага абсталявання. Таксама грашовыя сертыфікаты на абнаўленне матэрыяльна-тэхнічнай базы ўстанове аховы здароўя паднеслі памочнік Прэзідэнта Рэспублікі Беларусь – інспектар па Магілёўскай вобласці Міхаіл Русы, кіраўніцтва горада Магілёва, абласных грамадскіх арганізацый Фонду міру, Чырвонага Крыжа, «Белая Русь», «Беларускага саюза жанчын», савета ветэранаў.

Перад удзельнікамі мерапрыемства выступілі творчыя калектывы і выканаўцы абласнога цэнтра.

Магілёўскі абласны шпіталь інвалідаў Айчыннай вайны прызначаны для аказання спецыялізаванай планавай стацыянарнай медыцынскай дапамогі ветэранам вайны, асобам, якія пацярпелі ад наступстваў войнаў, пажылых людзей. Медустанова разлічана на 200 ложкаў кругласутачнага знаходжання. Тут функцыянуе чатыры стацыянарныя аддзяленні: тры тэрапеўтычныя на 150 ложкаў і адно неўралагічнае на 50 ложкаў.

Як паведаміў галоўны ўрач установы аховы здароўя Васіль Арцёменкаў, у шпіталі штогод рэгіструецца больш за 5 тыс. наведванняў, з іх каля 20-22% па медыцынскую дапамогу звяртаюцца ветэраны, інваліды і ўдзельнікі Вялікай Айчыннай вайны. Сёння тут праходзяць лячэнне 7 ветэранаў.