Сяргей Багдановіч: на розных гістарычных этапах супрацоўнікі КДБ годна выконвалі свой святы абавязак

Камітэт дзяржаўнай бяспекі адзначае сёння прафесійнае свята. У Магілёве з нагоды ўрачыстасці адбылася цырымонія ўскладання кветак да помніка «Чэкістам Магілёўшчыны». У мерапрыемстве прынялі ўдзел старшыня Магілёўскага аблвыканкама Анатоль Ісачанка, старшыня Магілёўскага абласнога Савета дэпутатаў Ірына Раінчык, старшыня Магілёўскага гарвыканкама Уладзімір Цумараў, прадстаўнікі праваахоўных органаў рэгіёна і інш.

«У афіцэраў Магілёўскага ўпраўлення КДБ ёсць добрая традыцыя – збірацца на гэтым месцы, каб ушанаваць памяць вядомых супрацоўнікаў, якія прысвяцілі свае жыцці служэнню нашай Айчыне, – расказаў ветэран органаў дзяржбяспекі Сяргей Багдановіч. – Гэтыя імёны вядомыя не толькі на Магілёўшчыне, але і за яе межамі. Гэта Кірыл Пракопавіч Арлоўскі, Аляксандр Маркавіч Рабцэвіч, Вера Захараўна Харужая, Леў Яфімавіч Маневіч і многія іншыя. Праца ўпраўлення па захаванні памяці аб іх гераічнай дзейнасці, напоўнена глыбокім выхаваўчым сэнсам. Вяртаючы іх гераічныя імёны з нябыту, мы выхоўваем у моладзі высокую грамадзянскую адказнасць. І кожны з маладых людзей пераймае для сябе іх найлепшыя чалавечыя рысы і якасці, героіку здзейсненага імі подзвігу.

Веданне і разуменне гісторыі гэтага трагічнага часу дапамагае нам вырашаць задачы захавання міру і стабільнасці ў нашай краіне. На розных гістарычных этапах супрацоўнікі КДБ па Магілёўскай вобласці годна выконвалі свой святы абавязак і ў рашучыя хвіліны для іх жыцця заўсёды рабілі выбар на карысць дабрабыту будучых пакаленняў. Вось чаму мы свята шануем іх імёны і выхоўваем маладых людзей так, каб яны памяталі аб ахвярах, не забывалі подзвігі, здзейсненыя гэтымі людзьмі».

Юлія Таранава, фота Галіны Гаўрыловіч