Транспартныя зносіны, добраўпарадкаванне і адкрыццё магазіна – Леанід Мартынюк правёў прыём грамадзян у Магілёве

Транспартныя зносіны, добраўпарадкаванне тэрыторый, рамонт дарог і адкрыццё магазіна. З такімі пытаннямі звярталіся жыхары Магілёўскай вобласці на асабісты прыём да памочніка Прэзідэнта – інспектара па Магілёўскай вобласці Леаніда Мартынюка. Прыём прайшоў сёння ў Магілёўскім райвыканкаме.

Так, жыхарка Магілёва звярнулася на прыём з пытаннем аб рамонце дарогі і ўборцы смецця на прыпыначным пункце ў садовым таварыстве «Усход-2008». Жанчына расказала, што ў 2010 годзе набыла тут участак. Летась праезджую частку непадалёк прывялі ў парадак, паклалі асфальт. Магіляўчанка расказала, што цяпер па дарозе на высокай хуткасці праязджаюць машыны, а ў яе двое дзяцей і яна баіцца за іх бяспеку. Жанчына папрасіла прапрацаваць пытанне ўстаноўкі там штучнай няроўнасці. У ДАІ адзначылі, што названая вуліца знаходзіцца ў ведамстве гарвыканкама і, калі там прымуць такое рашэнне, Дзяржаўтаінспекцыя падтрымае. Яшчэ адна праблема, з якой сутыкнуліся жыхары, – смецце на прыпыначным пункце непадалёк ад участка заяўніцы. Яна адзначыла, што для садовага таварыства вельмі важныя транспартныя зносіны з горадам і найбліжэйшымі населенымі пунктамі, аднак, што рабіць са смеццем, якое там збіраецца, незразумела. Складанасць яшчэ і ў тым, што частка вуліцы знаходзіцца ў падпарадкаванні Магілёўскага гарвыканкама, астатняя – райвыканкама. Адсюль і праблемы з вывазам адходаў.

Леанід Мартынюк адзначыў, што гэтыя пытанні будуць перададзены ў гарвыканкам для разгляду і далейшай працы.

Яшчэ адзін жыхар Магілёва звярнуўся на прыём, таму што сутыкнуўся з праблемамі падвядзення камунікацый да свайго зямельнага ўчастка. Калі мужчына вясной мінулага года набыў участак у вёсцы Таранава на аўкцыёне, які праводзіўся Магілёўскім райвыканкамам, у горадабудаўнічым пашпарце была прапісана магчымасць падключэння да электрычных, газавых сетак і водазабеспячэння. У працэсе будаўніцтва дома аказалася, што цэнтральнае водазабеспячэнне паблізу ўчастка адсутнічае, а літаральна ўчора стала вядома, што і з падключэннем да газаправода таксама могуць узнікнуць праблемы.

Як адзначыў прадстаўнік райвыканкама, у горадабудаўнічым пашпарце сапраўды дапушчана памылка і водазабеспячэння там няма. Варыянтаў рашэння ёсць некалькі: або мужчына звернецца ў суд і яму пакрыюць выдаткі на ўчастак і будаўніцтва, або ж ён правядзе водазабеспячэнне за ўласныя сродкі. Ёсць яшчэ варыянт пачакаць, калі ўчастак уключаць у план па будаўніцтве, а гэта прыкладна 2 гады. Падключыцца да газазабеспячэння ёсць магчымасць, але заяўніку будзе неабходна кампенсаваць частку выдаткаў. Магілёвец працягвае будаўніцтва дома, цяпер ужо дарабляе дах. Ён планаваў у наступным годзе пераехаць сюды, аднак, як жыць без вады, мужчына не ведае.

Як адзначыў Леанід Мартынюк, сітуацыя выйшла складаная, аднак, акрамя прапанаваных варыянтаў, па-іншаму вырашыць праблему немагчыма.

Сярод тых, хто звярнуўся, быў яшчэ адзін жыхар Магілёва. Ён падняў пытанне аб транспартных зносінах паміж абласным цэнтрам і вёскай Гуслішча. Мужчына папрасіў аб маршрутным таксі ад аўтавакзала да названага населенага пункта. Яшчэ адна жыхарка Магілёва прыйшла з пытаннем аб адкрыцці магазіна па вуліцы Прыгарадная ў Магілёве. Таксама жанчына звярнула ўвагу на магчымасць добраўпарадкавання і ўстаноўкі асвятлення ў праходзе ад вуліцы Бароўская да вуліцы Залуцкага, бо гэта дарога злучае прыватны сектар і вуліцу Залуцкага.

Леанід Мартынюк падкрэсліў, што ўсе пытанні будуць дадаткова вывучаны.

«Калі маеш зносіны з людзьмі падчас прыёмаў, адчуваецца інфармацыйны і прававы вакуум. Людзі лічаць свае праблемы першараднымі, і вырашыць іх трэба так, як будзе правільна з іх пункту гледжання. Але існуючыя нарматыўна-прававыя акты, заканадаўства павінны карэляваць інтарэсы. Таму задача прадстаўнікоў усіх узроўняў улады – тлумачэнне і своечасовае інфармаванне людзей. Гэта павінна ў канчатковым выніку знізіць паток зваротаў грамадзян, унясе пэўную ступень спакою ў жыццё людзей. Мы павінны даваць людзям поўную і кампетэнтную інфармацыю па пытаннях, якія паступаюць», – падкрэсліў памочнік Прэзідэнта – інспектар па Магілёўскай вобласці.

Сёння на прыём да памочніка Прэзідэнта – інспектара па Магілёўскай вобласці – звярнуліся жыхары абласнога цэнтра і Бабруйска, Магілёўскага, Бялыніцкага і Кіраўскага раёнаў – усяго 10 чалавек.

БЕЛТА