Турыстам і заўзятарам II Еўрапейскіх гульняў у Мінску гатовыя прапанаваць у гасцініцах да 2 тыс. нумароў

Каля 2 тыс. нумароў у гасцініцах і хостэлах змогуць прыняць турыстаў і заўзятараў II Еўрапейскіх гульняў, з суб’ектамі гаспадарання падпісаны мемарандум аб стрымліванні тарыфаў на паслугі, паведамілі ў Галоўным упраўленні спажывецкага рынку Мінгарвыканкама.

Так, кошты ў перыяд падрыхтоўкі і правядзення спаборніцтваў не павінны павялічыцца больш, чым на 10% у параўнанні з дзейнымі на 1 чэрвеня 2018 года ў доларавым эквіваленце паводле курсу Нацбанка.

Усяго ў Мінску налічваецца 52 гасцініцы і пяць хостэлаў на 6 тыс. нумароў з аднаразовай умяшчальнасцю каля 10 тыс. чалавек. Для пражывання кліент-груп афіцыйных асоб гульняў вызначаны 31 гасцінічны комплекс на 5 тыс. нумароў. З імі падпісаны дагаворы аб арганізацыі размяшчэння ў адпаведнасці з патрабаваннямі ЕАК.

БЕЛТА