Турысты з 18 краін свету наведалі Магілёўскую вобласць у 2021 годзе

Тэматычны агляд да Сусветнага дня турызму, які штогод адзначаецца 27 верасня, падрыхтавала галоўнае статыстычнае ўпраўленне Магілёўскай вобласці.

Паводле яго даных, турыстычную дзейнасць у рэгіёне ў 2021 годзе ажыццяўлялі 92 арганізацыі, якія супрацоўнічалі з 44 краінамі свету. Паслугамі гэтых арганізацый скарысталася 88,3 тысячы турыстаў і экскурсантаў. У 66 гасцініцах размяшчаліся 138,7 тысячы чалавек, больш за 10 працэнтаў якіх – замежнікі.

Усяго рэгіён наведалі 2 тысячы арганізаваных замежных турыстаў і экскурсантаў з 18 краін свету. У сярэднім яны знаходзіліся тут 3 дні і аплацілі туры на 0,8 мільёна рублёў. Найбольшая колькасць замежнікаў – з расійскіх грамадзян (75,6 працэнта). Сярод астатніх краін лідарамі сталі Украіна, Азербайджан, Германія і Арменія.

Цікавасць да арганізаваных турыстычных паездак у межах краіны праявілі 66,1 тысячы грамадзян Беларусі. Часцей за ўсё яны выбіралі аднадзённыя турыстычныя паездкі (76,3 працэнта).

Карыстаўся папулярнасцю аздараўленчы і рэкрэацыйны турызм. У 51 санаторна-курортнай, аздараўленчай арганізацыі і іншых спецыялізаваных сродках размяшчэння Магілёўскай вобласці адпачыла 43,6 тысячы чалавек (91,1 працэнта – беларусы). Што тычыцца аграэкатурызму, то паслугамі 245 суб’ектаў скарысталіся 58,8 тысячы чалавек.

У той жа час беларусы актыўна выязджалі за мяжу. 20,3 тысячы чалавек арганізавана наведалі 33 краіны свету і аплацілі туры на 30,1 мільёна рублёў. У сярэднім за мяжой яны знаходзіліся 10 дзён. У топе па наведвальнасці – Егіпет, Турцыя, Польшча, Аб’яднаныя Арабскія Эміраты, Расійская Федэрацыя і Грузія.

СБ