У Буйнічах пакажуць элементы паветранага бою часоў Вялікай Айчыннай вайны

Тэатралізаваны паветраны бой стане часткай прысвечанага Дню Незалежнасці Беларусі святочнага мерапрыемства, якое пройдзе на Буйніцкім полі 3 ліпеня.

У неба паднімуцца тры самалёты Як-55, хуткасныя, лёгкія, манеўраныя. Два пакажуць савецкую тэхніку, яшчэ адзін – варожую.

– Гэта будзе не нейкая канкрэтная бітва, мы аднаўляем элементы паветраных баёў, у цэлым характэрных для часоў Вялікай Айчыннай вайны, – удакладніў старшыня Магілёўскай абласной арганізацыйнай структуры ДТСААФ Аляксандр Мазур. – Падрыхтоўка тэхнікі і рэпетыцыі ўжо ідуць поўным ходам. Старанна прадумваем і пытанні бяспекі.

Увечары таго ж дня на мемарыяльным комплексе «Буйніцкае поле» гледачы ўбачаць паказальныя скачкі парашутыстаў. У паветры з велізарным беларускім сцягам будзе кружыць верталёт.

А што яшчэ?

Магілёўская абласная арганізацыйная структура ДТСААФ прыме ўдзел і ў шэрагу іншых мерапрыемстваў.

Міжнародны аўтапрабег «Садружнасць: ад Буга да Байкала», у маршрут якога ўваходзяць многія гарады Беларусі і Расіі, прыбудзе ў Магілёўскую вобласць 23 чэрвеня.

– У гэты дзень мітынгі і ўрачыстыя ўскладанні кветак, сустрэчы ветэранаў з моладдзю пройдуць у Бабруйску ля магілы генерал-маёра танкавых войскаў Барыса Бахарава і ў Магілёве на Буйніцкім полі, – расказвае Аляксандр Мазур. – 24 чэрвеня наведаем Касцюковічы, дзе ўшануем памяць генерала арміі Васіля Маргелава.

Нагадаем, аўтапрабег прысвечаны 76-й гадавіне Перамогі савецкага народа ў Вялікай Айчыннай вайне, 60-годдзю першага палёту чалавека ў космас, блізкаму 95-годдзю стварэння ДТСААФ. Удзельнікі робяць прывалы ў знакавых для беларусаў і расіян месцах і праводзяць урачыстыя мерапрыемствы ля помнікаў, абеліскаў, мемарыялаў. Мэта – захаванне ў грамадзян Саюзнай дзяржавы гістарычнай памяці аб подзвігу савецкага народа, барацьба з фальсіфікацыяй гісторыі Другой сусветнай вайны, развіццё і ўмацаванне сувязяў паміж гарадамі-героямі і гарадамі вайсковай славы на маршруце аўтапрабегу.

На фестывалі «Александрыя збірае сяброў», запланаваным на 10 ліпеня, Магілёўскі аэраклуб парадуе гледачоў фігурамі вышэйшага пілатажу.

А 15–17 ліпеня ў Бабруйску напярэдадні Алімпійскіх гульняў ДТСААФ арганізуе тэматычны квэст. Моладзь чакаюць больш за 20 пунктаў з заданнямі. Жадаючыя змогуць паглядзець на горад з вышыні птушынага палёту падчас аглядных экскурсій на самалёце або верталёце.

sb.by