У Магілёўскай вобласці азімы рапс пасеяны на 65% ад запланаваных плошчаў

На сённяшні дзень у Магілёўскай вобласці азімы рапс пасеяны на 65% ад запланаваных плошчаў. Пра гэта паведамілі ў аддзеле раслінаводства камітэта па сельскай гаспадарцы і харчаванні Магілёўскага аблвыканкама.

«Пад ураджай наступнага года ў Магілёўскай вобласці плануецца пасеяць азімы рапс на плошчы 64 тыс. га. На сённяшні дзень культура ўжо пасеяна амаль на 42 тыс. га, што складае 65% ад запланаванага», – адзначылі ў аддзеле раслінаводства.

Па тэхналагічным рэгламенце наступная культура, сяўбу якой пачнуць у рэгіёне, – азімы ячмень. Для яго адведзена 28 тыс. га. «Гэту культуру неабходна пасеяць да 10 верасня», – адзначылі спецыялісты.

Актыўнымі тэмпамі ў рэгіёне працягваецца ўборка ўраджаю – па намалоце збожжавых і зернебабовых культур аграрыі Магілёўскай вобласці набліжаюцца да запаветнай адзнакі ў 1 млн т. Працягваецца нарыхтоўка насення і кармоў. «Працы ідуць поўным ходам», – падкрэслілі спецыялісты.

У Магілёўскай вобласці сельскагаспадарчыя прадпрыемствы, у якіх маюцца сады, ужо ў найбліжэйшы час прыступяць да масавага збору ўраджаю яблыкаў летняга і восеньскага тэрмінаў паспявання. «Ужо заўтра ў садах ААТ «Рассвет імя К. П. Арлоўскага» прыступяць да збору ўраджаю яблыкаў. Яны будуць паступаць у гандлёвую сетку і на перапрацоўку. Пазнейшыя гатункі карыснага фрукта будуць закладваць у стабфонд вобласці», – расказалі ў аблвыканкаме.

БЕЛТА