Рус Бел Eng 中文

У Магілёўскай вобласці ў 2018 годзе на будаўніцтва аб’ектаў адукацыі накіравалі Br15 млн.

У Магілёўскай вобласці ў 2018 годзе на будаўніцтва аб’ектаў адукацыі накіравалі Br15 млн. Пра гэта паведаміў сёння на выніковай калегіі галоўнага ўпраўлення па адукацыі аблвыканкама яго начальнік Уладзімір Рыжкоў.

Так, у Бабруйску ўвялі ў эксплуатацыю сярэднюю школу ў мікрараёне Заходні. У Магілёве пачалося будаўніцтва сярэдняй школы на 1020 месцаў у мікрараёне Казіміраўка, якое будзе працягнута ў бягучым годзе. У найбліжэйшых планах, накіраваных на развіццё сельскіх населеных пунктаў, – узвядзенне ў вёсцы Дабрэйка Шклоўскага раёна дзіцячага сада на 40 месцаў.

Яшчэ Br18,8 млн. у 2018 годзе было выдаткавана на капітальны і бягучы рамонты ўстаноў адукацыі рэгіёна, дадаў Уладзімір Рыжкоў. У прыватнасці, значныя работы правялі ў Магілёве і Шклоўскім раёне падчас падрыхтоўкі да V Форуму рэгіёнаў Беларусі і Расіі. У 2019-м плануецца правесці замену шматлікіх сістэм асвятлення навучальных устаноў на энергаэфектыўныя.

Паводле слоў Уладзіміра Рыжкова, у мінулым годзе спецыялізаваныя арганізацыі правялі агульныя абследаванні будынкаў 35 устаноў адукацыі вобласці. Паводле вынікаў выдадзеных заключэнняў распрацоўваецца праектна-каштарысная дакументацыя на капітальны рамонт 12-ці, знесена 13 будынкаў і прыпынена эксплуатацыя 4-х: дзіцячага садка №40 Магілёва, ясляў-сада ў в. Гарадзішча Шклоўскага раёна, сярэдняй школы №4 Асіповічаў, басейна абласнога цэнтра творчасці.

Начальнік Галоўнага ўпраўлення па адукацыі аблвыканкама звярнуў увагу, што з мэтай павышэння ўзроўню грамадскай бяспекі сістэмамі відэаназірання ў рэгіёне абсталявана 113 устаноў, яшчэ 36 чакаюць сваёй чаргі. Кнопкі ахоўнай сігналізацыі ёсць у 508 навучальных установах вобласці (62,5%). Неабходна завяршыць абсталяванне вывадам сігнала на пункт дыспетчарызацыі МНС «Маланка» 16 аб’ектаў.

 

Гаворачы аб адукацыі, Уладзімір Рыжкоў падкрэсліў асаблівую важнасць прафесійнага прафілявання падлеткаў. Сёння працоўнае навучанне па 29 прафесіях у рэгіёне праходзіць больш за 2,1 тыс. навучэнцаў базавых класаў, 68,8% з іх – на базе ўстаноў прафесійна-тэхнічнай і сярэдняй спецыяльнай адукацыі. У межах факультатыўных гадзін асвойваюць прафесіі вадзіцеля, трактарыста-машыніста сельскагаспадарчай вытворчасці 172 навучэнцы ў Магілёўскім, Горацкім, Клічаўскім, Чавускім раёнах. У 2018 годзе 86 выпускнікоў педагагічных класаў атрымала рэкамендацыі для паступлення на адпаведныя спецыяльнасці без уступных экзаменаў. Для павышэння прэстыжу сельскагаспадарчых прафесій з бягучага года ў рэгіёне адкрыты класы аграрнай накіраванасці на базе 53 устаноў агульнай сярэдняй адукацыі. «Асноўнае ў гэтай працы – не нашкодзіць, таму трэба забяспечыць якасны ўдзел у адукацыйным працэсе спецыялістаў сельскагаспадарчых арганізацый, педагогаў ПТНУ і ССНУ», – канстатаваў начальнік галоўнага ўпраўлення.

У сваю чаргу ўстановы прафесійна-тэхнічнай і сярэдняй спецыяльнай адукацыі праводзяць значную працу па прыцягненні моладзі і забеспячэнні патрэб эканомікі ў кваліфікаваных кадрах, паведаміў Уладзімір Рыжкоў. Адладжаны механізм прагназавання, узаемадзеяння арганізацый – заказчыкаў кадраў – па заключэнні дагавораў аб узаемадзеянні, атрыманні заявак і адначасовага размяшчэння звестак аб патрэбе ў маладых спецыялістах у аўтаматызаванай сістэме «дзяржзаказ і прыём». У 2019 годзе 84 арганізацыі з’яўляюцца базавымі для ўстаноў адукацыі.

Пры выкарыстанні матэрыялаў актыўная гіперспасылка на mogilev-region.gov.by абавязковая