RU BY EN 中文
Twitter Instagram

У МДУ імя А. А. Куляшова пачнуць рыхтаваць кіраўнікоў па ваенна-патрыятычным выхаванні

З гэтага года ў Магілёўскім дзяржаўным універсітэце імя А. А. Куляшова ўпершыню ў краіне пачнуць навучаць па спецыяльнасці «фізічная культура. Ваенна-патрыятычнае выхаванне» з прысваеннем кваліфікацыі «Выкладчык. Кіраўнік па ваенна-патрыятычным выхаванні» і ступені бакалаўра. Тэрмін навучання складзе чатыры гады.

Перадумовай для яе адкрыцця паслужыла тое, што ў 2021 годзе ва ўстановах агульнай сярэдняй адукацыі была ўведзена пасада кіраўніка па ваенна-патрыятычным выхаванні. Цяпер працаваць на гэтай пасадзе маюць права толькі былыя ваенныя, якія маюць педагагічную адукацыю, або спецыялісты з вышэйшай педагагічнай адукацыяй, якія адслужылі ва Узброеных Сілах. З'явілася запатрабаванне ў кадрах, якія змогуць запоўніць гэтую вакансію ва ўстановах агульнай сярэдняй адукацыі, тлумачыць дэкан факультэта фізічнага выхавання МДУ імя А. А. Куляшова Уладзімір Шутаў:

- У савецкія гады ў нашым універсітэце працавала ваенная кафедра, якая рыхтавала намеснікаў дырэктараў школ па пачатковай ваеннай падрыхтоўцы. Таму Міністэрствам адукацыі нам было даверана арганізаваць пілотны праект і падрыхтаваць дакументы для адкрыцця гэтай спецыяльнасці. З мінулага года мы ўвялі прафілізацыю па ваенна-патрыятычным выхаванні, зараз па ёй навучаюцца 21 студэнт. З гэтага года ўводзіцца новая, здвоеная, спецыяльнасць. Выпускнікі змогуць працаваць як настаўнікамі фізкультуры, так і кіраўнікамі па ваенна-патрыятычным выхаванні.

Навучальны план уключае такія дысцыпліны, як «Дапрызыўная падрыхтоўка і арганізацыя вучэбна-палявых збораў», «Даўрачэбная дапамога», «Страявая падрыхтоўка», «Правілы пажарнай бяспекі», «Паводзіны чалавека ў экстрэмальных умовах», «Забеспячэнне бяспекі адукацыйнага працэсу ва ўстановах агульнай сярэдняй адукацыі», «Методыка выкладання абароны насельніцтва і аб'ектаў ад надзвычайных сітуацый», «Методыка ваенна-патрыятычнага выхавання», «Агнявая падрыхтоўка» і іншыя.

Дагавор аб супрацоўніцтве, заключаны з абласным ваенным камісарыятам і 188-й гвардзейскай інжынернай брыгадай, дасць магчымасць выкарыстоўваць іх матэрыяльна-тэхнічную базу для правядзення заняткаў па страявой падрыхтоўцы, здачы нарматываў афіцэрскіх ваенных мнагабор'яў, арганізацыі ваенна-палявых збораў. Яшчэ адна перавага — хлопцы на конкурснай аснове змогуць атрымаць ваенна-ўліковую спецыяльнасць на базе ваеннай кафедры Беларуска-Расійскага ўніверсітэта.

План прыёму - 20 чалавек. Абітурыентам неабходна прадаставіць два сертыфікаты па ЦЭ/ЦТ (руская або беларуская мова, біялогія), а таксама здаць унутраны экзамен па фізкультуры, які ўключае шэсць кантрольных выпрабаванняў.

СБ

Пры выкарыстанні матэрыялаў актыўная гіперспасылка на mogilev-region.gov.by абавязковая