Устаноўлены медаль у гонар 75-годдзя вызвалення Беларусі ад нямецка-фашысцкіх захопнікаў

Устаноўлены юбілейны медаль «75 год вызвалення Беларусі ад нямецка-фашысцкіх захопнікаў». Адпаведны ўказ нумар 134 Прэзідэнт Беларусі Аляксандр Лукашэнка падпісаў 2 красавіка. Аб гэтым паведамілі ў прэс-службе беларускага лідара.

Медалём узнагароджваюцца ветэраны Вялікай Айчыннай вайны, былыя вязні фашысцкіх лагераў, турмаў, гета і іншых месцаў прымусовага ўтрымання, створаных фашыстамі і іх саюзнікамі ў гады Другой сусветнай вайны.

Акрамя таго, гэтай узнагароды могуць удастойвацца замежныя грамадзяне і асобы без грамадзянства, якія пастаянна пражываюць за межамі Беларусі і прымалі непасрэдны ўдзел у баявых дзеяннях за вызваленне краіны, а таксама ваеннаслужачыя Узброеных Сіл Беларусі і іншых воінскіх фарміраванняў, работнікі дзяржаўных органаў і асобы, якія ўнеслі значны ўклад у героіка-патрыятычнае выхаванне грамадзян Беларусі, увекавечванне памяці загінулых, арганізацыю мерапрыемстваў, прысвечаных 75-годдзю вызвалення краіны.

Медаль вырабляецца з латуні. На яго правым баку размешчаны абеліск «Мінск - горад-герой» і скульптура жанчыны, якая ўвасабляе вобраз Радзімы. Па акружнасці медаля нанесены надпіс «Подзвіг народа несмяротны». Колеры стужкі на калодцы медаля, што адлюстроўваюць каляровыя рашэнні ордэна Айчыннай вайны I ступені і медаля «Партызану Айчыннай вайны» I ступені, падкрэсліваюць уклад чатырох франтоў і партызан у вызваленне Беларусі.

БЕЛТА