Забарона на наведванне лесапаркавых зон уведзена ў Магілёве

Забарона на наведванне лесапаркавых зон аб’яўлена на тэрыторыі Магілёва ў сувязі з увядзеннем чацвёртага класа пажарнай небяспекі з-за ўмоў надвор’я. Адпаведнае рашэнне гарвыканкама было прынята 23 чэрвеня і звязана са спякотай, якая ўсталявалася ў рэгіёне, паведамілі ў Магілёўскім лясгасе.

«На тэрыторыі абласнога цэнтра размешчана некалькі лесапаркавых зон, аднак асабліва небяспечнымі з-за неспрыяльных пагодных умоў лічацца лясны масіў па вуліцы Сасновай у раёне Магілёўскага абласнога супрацьтуберкулёзнага дыспансера і лесапаласа ўздоўж Слаўгарадскай шашы, – адзначылі суразмоўцы. – На тэрыторыю гарадскіх паркаў, у тым ліку самага вялікага з іх Пячэрскага лесапарку, забарона не распаўсюджваецца».

Да наступлення спрыяльнага надвор’я і зніжэння класа пажаранебяспекі знаходжанне грамадзян на названых тэрыторыях і ўезд туды транспарту забаронены. За парушэнне патрабаванняў прадугледжана адміністрацыйная адказнасць, удакладнілі ў лясгасе.

У Магілёўскай вобласці забарона на наведванне лясоў уведзена ва ўсіх раёнах, акрамя Клімавіцкага і Касцюковіцкага, дзе наведванне лясоў абмежавана з 21 чэрвеня, а таксама Хоцімскага.

БЕЛТА