Жыхароў Магілёўскай вобласці запрашаюць прыняць удзел у акцыі «Тыдзень лесу – 2019»

Жыхароў Магілёўскай вобласці запрашаюць прыняць удзел у акцыі «Тыдзень лесу – 2019». Традыцыйнае мерапрыемства адбудзецца 13-20 красавіка.

У лясгасах рэгіёна будуць падрыхтаваны спецыяльныя аб’екты, на якіх добраахвотнікам дадуць магчымасць пасадзіць дрэвы, добраўпарадкаваць тэрыторыю, прыняць удзел у навядзенні парадку ў лесе, стварыць памятную алею або закласці дэндрапарк. Кожны зможа выбраць, якім чынам унесці свой уклад у справу захавання і памнажэння лясных багаццяў Рэспублікі. Арганізацыі лясной гаспадаркі забяспечаць усіх пасадачным матэрыялам і прыладамі працы.

Штогод, як паказвае статыстыка, да мерапрыемства далучаецца ўсё большая колькасць жыхароў Магілёўшчыны, падкрэслілі суразмоўцы. Таксама ў акцыі штогод прымаюць актыўны ўдзел прадстаўнікі Савета Міністраў, дэпутацкага корпуса, кіраўнікі розных міністэрстваў і ведамстваў, абласных і раённых выканаўчых камітэтаў, грамадскіх арганізацый, бізнес-супольнасцей.

Падрабязную інфармацыю па канкрэтных мерапрыемствах акцыі і ўмовах удзелу ў ёй можна ўдакладніць у цэнтральным або абласным аргкамітэтах акцыі, а таксама ў лясгасах вобласці па тэлефонах:

– цэнтральны аргкамітэт: 8-017-200-47-31;

– абласны аргкамітэт: 8-0222-31-13-25.

Інфармацыя па пераліку аб’ектаў работ (з указаннем месца і відаў работ), кантактныя тэлефоны размешчаны на інтэрнэт-сайтах ДВЛГА і лясгасаў.

Акцыя «Тыдзень лесу» праводзіцца з 2007 года па ініцыятыве Міністэрства лясной гаспадаркі пры ўдзеле Упраўлення справамі Прэзідэнта Рэспублікі Беларусь, Міністэрства абароны Рэспублікі Беларусь, аблвыканкамаў, Беларускага таварыства лесаводаў і іншых арганізацый на землях ляснога фонду Беларусі.