Аграрыі выбарачна прыбіраюць падгарэлыя збожжавыя

У ААТ «Дабаснянскае» Кіраўскага раёна прыступілі да ўборкі рапсу. Пакуль ўзяліся за падгарэлыя ўчасткі. Да гэтага ўбралі азімы ячмень. Гэту культуру ў галіне апрацоўваюць другі год: больш цёплыя зімы дазволілі атрымліваць ранняе збожжа для фуражу. Азімы ячмень ужо сабраны, сярэдняя ўраджайнасць каля 40 цэнтнераў з гектара. У сямі раёнах прыступілі да ўборкі збожжавых і зернебабовых (гаворка ідзе пра падгарэлыя ўчасткі), усяго намалацілі каля 2 тысяч тон.

Ні ў раёне, ні ў вобласці ў цэлым не спяшаюцца рабіць прагноз на ўраджай збожжавых. З-за засухі страты чакаюць, але збожжа яшчэ наліваецца. Насенная інспекцыя кожны дзень бярэ пробы зерня на вільготнасць: паказчык пакуль каля 30 працэнтаў, а для ўборкі трэба не вышэй за 24. Збожжаўборачныя камбайны ў баявой гатоўнасці.

А вось другі ўкос шматгадовых траў у поўным разгары: скошаная палова плошчаў – 35 тысяч гектараў. Але спякота і засуха не даюць травам набраць чаканага аб’ёму: тыя, што пры першым ўкосе прыбіралі ў самым пачатку, яшчэ паспелі дарасці да кандыцыі, але дэфіцыт вільгаці адбіваецца.

У КСУП «Ніва-Барсукі» Кіраўскага раёна паўтарагадовы запас кармоў – норма. Прадавалі суседзям, кормяць запасамі з даданнем зялёнкі і закладваюць у траншэі свежыя травяныя кармы. Другі год тут выкарыстоўваюць дзевяціметровую касілку беларускай вытворчасці. Па словах галоўнага агранома Сяргея Сіўчыкава, укладанні ў новую тэхніку, угнаенні і не толькі пралічваюць загадзя з пункту гледжання эканамічнага эфекту:

– Гэты агрэгат па прадукцыйнасці замяняе тры старыя трохметровыя касілкі. На зялёным жніве ў нас задзейнічаны яшчэ два кормаўборачныя камбайны і восем машын на адвозе. Да канца тыдня з другім укосам фінішуем. Але пасля збожжавых перад кукурузай ацэнім, ці вартыя ўчасткі на нязручнасцях, дзе трава яшчэ ў рост не пайшла: у нас няма дэфіцыту кармоў, навошта забіваць тэхніку. У палімернай упакоўцы нарыхтоўваем трохі – каля 350 тон: тэхналогія не з танных, такі корм даём цялятам і атрымліваем прыбаўленні каля кілаграма. Вясна была зацяжнай. Тыдні на два пазней пачалі прыбіраць свірэпіцу на падкормку. Затое, у адрозненне ад мінулага года, у гэтым не было дажджоў, і травяныя кармы нарыхтоўваем лепшай якасці, усе работы ўдалося выканаць у аптымальныя тэрміны. Перажываем, каб рэкордная спякота не павярнулася градам, як палохаюць сіноптыкі, таму што летась ён нам папсаваў віды на ўраджай. А вось дождж не перашкодзіў бы і для наліву збожжавых, і для кукурузы.

Планы па корманарыхтоўцы ў магілёўскіх аграрыяў практычна на ўзроўні мінулага года – 1 мільён 60 тысяч тон кармавых адзінак. Акцэнт на якасць – толькі першым класам. Папярэдні аналіз ветэрынарных лабараторый пакуль такая якасць пацвярджае, але канчатковая ацэнка будзе дадзена пазней, калі прыбраныя кармы, што называецца, паспеюць. Адначасова ідзе ўборка насеннікаў шматгадовых траў, прыступілі да цераблення лёну на зелянец. Паводле прагнозаў спецыялістаў, уборачная ў вобласці пачне набіраць абароты прыблізна праз тыдзень. На нарыхтоўцы кармоў тэрміны жніва не адаб’юцца, у кожным раёне будзе працаваць міжгаспадарчы механізаваны атрад. Намеснік старшыні камітэта па сельскай гаспадарцы і харчаванні Магілёўскага аблвыканкама Дзмітрый Міхалёў лічыць, што пра планы на хлеб гаварыць пакуль рана, прагнозы можна будзе рабіць толькі ў разгар масавай уборкі:

– Спякота адбілася на тым, як наліваецца зерне. У фарміраванне ўраджаю ўкладзена шмат сродкаў і сіл, з розных крыніц сельгасарганізацыям вялікую дапамогу аказвалі на набыццё ўгнаенняў, запчастак, забеспячэнне ГЗМ. І зараз, нягледзячы на капрызы прыроды, неабходна максімальна выкарыстоўваць усе рэсурсы і няўхільна выконваць тэхналогію, каб атрымаць максімальны прыбытак. Па даручэнні кіраўніка дзяржавы да 1 жніўня магілёўскім аграрыям выдзеляць у дапамогу паўсотню новых камбайнаў, што дазволіць знізіць нагрузку. Што тычыцца наступнага ўраджаю, то акцэнт будзе на пашырэнне пасеваў рапсу. Культура рэнтабельная, да таго ж папоўніць дэфіцыт бялку для жывёлагадоўлі. У паўднёвых раёнах стаўка на азімыя збожжавыя. Прырода пад нас падладжвацца не будзе, а азімыя могуць максімальна выкарыстоўваць для росту вясновую вільгаць і не так схільныя да летняй засухі, як яравыя. Хлеб лічаць у свіране, але нашы хлебаробы настроены на годны ўраджай.

 СБ