Акцыя пад дэвізам «Ратаваць людзей у нас у крыві» прайшла ў Магілёве

Магілёўская абласная арганізацыя Беларускага Чырвонага Крыжа правяла сустрэчу з валанцёрамі ў рамках месячніка донарства крыві, які быў аб'яўлены сумесна з галоўным упраўленнем па ахове здароўя Магаблвыканкама.

- Актыўнае донарства - залог эфектыўнага функцыянавання службы крыві нашай краіны, - адзначыў старшыня Магілёўскай абласной арганізацыі БКК Андрэй Мартыноўскі. - Прыемна, што на наш пасыл адгукнуліся многія. Ужо каля 200 валанцёраў Чырвонага Крыжа выказалі жаданне здаць кроў. Праца вядзецца не толькі ў Магілёве, але і ў раёнах вобласці. Я хачу выказаць вялікую падзяку кожнаму, хто сёння з намі. А ўдзел у мерапрыемстве генеральнага сакратара БКК Дзмітрыя Шаўцова гаворыць аб значнасці нашай ініцыятывы для ўсёй краіны.

- У цэлым у аснову многіх сучасных медыцынскіх тэхналогій кладуцца кампаненты крыві, а значыць, гэта выратаванне жыццяў, - сказаў Дзмітрый Шаўцоў, які таксама далучыўся сёння да тых, хто здаваў кроў. - Больш за тое, раней Беларусь марнавала велізарныя грошы, каб закупляць за мяжой медыцынскія прэпараты на аснове кампанентаў крыві. Цяпер шмат вырабляецца ў краіне, і гэта падвышае неабходнасць у павелічэнні аб'ёмаў донарскай крыві. Па лініі Чырвонага Крыжа праводзіцца вялікая работа па прыцягненню донараў: арганізуюцца розныя мерапрыемствы, да нас далучаюцца медыйныя, вядомыя асобы, якія сваім прыкладам папулярызуюць донарства, ганаровыя донары сустракаюцца з калектывамі ўстаноў і арганізацый, расказваючы аб сваім вопыце. Упэўнены, ініцыятыву Магілёўскай вобласці падхопяць і іншыя рэгіёны краіны, што ўжо абмяркоўваецца на ўзроўні РНПЦ трансфузіялогіі і медыцынскіх біятэхналогій, і акцыя стане рэспубліканскай.

- Неабходнасць у аб'ёмах крыві расце прапарцыйна з развіццём медыцыны, - працягвае тэму намеснік начальніка галоўнага ўпраўлення па ахове здароўя Магілёўскага аблвыканкама Аляксандр Бабак. - Акцыя пад дэвізам «Ратаваць людзей у нас у крыві» ў чарговы раз паказала, колькі сярод жыхароў Магілёўшчыны неабыякавых людзей з высокай грамадзянскай пазіцыяй, гатовых стаць донарамі, у тым ліку і з ліку моладзі. І я ўпэўнены, што кожны з прысутных сёння донараў раскажа ў калектывах, сваім знаёмым пра акцыю, і хтосьці абавязкова рушыць услед іх прыкладу.

mogilevnews.by