Амаль 14 га лесу дапамаглі аднавіць прафсаюзы ў Магілёўскай вобласці

У Магілёўскай вобласці прафсаюзы дапамаглі аднавіць каля 14 га лесу. Аб гэтым паведамілі ў прэс-службе ФПБ.

Федэрацыя прафсаюзаў Беларусі традыцыйна падключылася да акцыі «Дай лесу новае жыццё!». «Прафактыў не першы раз працуе на высадцы лесу. Напрыклад, толькі восенню мінулага года ў цэлым па краіне дапамаглі аднавіць больш як 75 га лясных угоддзяў, - адзначылі ў прэс-службе. - Сёння каля 200 прадстаўнікоў нацыянальнага прафцэнтра, галіновых прафсаюзаў аднаўлялі лясныя ўгоддзі ў Магілёўскай вобласці. Гэты рэгіён найбольш пацярпеў ад летняга ўрагану. Заходскае і Слатэнаўскае лясніцтва, дзе працавалі прадстаўнікі прафсаюзаў, таксама атрымалі сур'ёзны ўрон у выніку стыхіі. Гэтыя тэрыторыі ўжо расчышчаны і падрыхтаваны для высадкі новых насаджэнняў».

Старшыня ФПБ Юрый Сянько падкрэсліў, што прафсаюзы, як і ўся краіна, актыўна падключыліся да закліку кіраўніка дзяржавы прыняць удзел у аднаўленні пацярпелых лясоў. «Гэта самае малое, што сёння можна і трэба зрабіць кожнаму, - фізічна папрацаваць для сваёй краіны. Каб у будучым наша краіна была больш прыгожай, унесці свой уклад для будучых пакаленняў - тое, што мы сёння робім, дасць свае вынікі праз шмат гадоў. І, вядома, удзел у гэтай акцыі для кожнага, у тым ліку і для моладзі, важны, каб разумець і ўсведамляць, якая гэта нялёгкая праца, і адчуць сябе ўдзельнікам гэтай вялікай добрай справы», - дадаў Юры Сянько.

У выніку работы прадстаўнікоў прафсаюзаў у двух лясгасах - Магілёўскім і Чавускім - на тэрыторыі практычна ў 14 га высаджана каля 50 тыс. саджанцаў. У асноўным гэта хваёвыя пароды.

БЕЛТА