Арганізацыі Магілёўскай і Ленінградскай абласцей правялі анлайн-сустрэчу па інвестыцыйным і гандлёва-эканамічным супрацоўніцтве

Арганізацыі Магілёўскай і Ленінградскай абласцей правялі сёння анлайн-сустрэчу па інвестыцыйным і гандлёва-эканамічным супрацоўніцтве. Пра гэта паведамілі ў Магілёўскім агенцтве рэгіянальнага развіцця, якое сумесна з Агенцтвам эканамічнага развіцця Ленінградскай вобласці выступіла арганізатарам мерапрыемства.

Ад беларускага боку ў перамовах прымалі ўдзел прадстаўнікі ААТ «Магілёўскае агенцтва рэгіянальнага развіцця», СЭЗ «Магілёў», Крычаўскага і Краснапольскага раённых выканкамаў, ад расійскага – ДКУ «Агенцтва эканамічнага развіцця Ленінградскай вобласці».

Як распавялі суразмоўцы, сустрэча праводзілася ў анлайн-фармаце. У межах мерапрыемства Магілёўскае агенцтва рэгіянальнага развіцця і СЭЗ «Магілёў» прэзентавалі інвестыцыйны патэнцыял рэгіёну, які накіраваны на прыцягненне замежных, нацыянальных інвестыцый для стварэння новых і далейшага развіцця дзеючых экспартна-арыентаваных і імпартазамяшчальных вытворчасцей. У сваю чаргу партнёры Ленінградскай вобласці азнаёмілі беларусаў з інвестыцыйным патэнцыялам свайго рэгіёну. Абодва бакі праявілі зацікаўленасць у сферы лесаперапрацоўкі і лесапрамысловага кластара.

Акрамя гэтага, бакі абмяняліся вопытам і абмеркавалі метады работы па прыцягненні інвестыцый у складанай эпідэміялагічнай абстаноўцы. ААТ «Магілёўскае агенцтва рэгіянальнага развіцця», СЭЗ «Магілёў» і прадстаўнікі бізнэсу былі запрошаны да ўдзелу ў Балтыйскім рэгіянальным інвестыцыйным форуме, які адбудзецца 21-24 верасня, у сваю чаргу ДКУ «Агенцтва эканамічнага развіцця Ленінградскай вобласці» праявіла цікавасць да ўдзелу ў Магілёўскім інвестыцыйным кангрэсе.

«Падчас анлайн-сустрэчы ўдзельнікам прадставілася выдатная магчымасць для абмену інфармацыяй, устанаўлення новых дзелавых кантактаў, а таксама абмеркавання магчымасцей для гандлёва-эканамічнага супрацоўніцтва і інвестыцыйнага ўзаемадзеяння», – падзяліліся суразмоўцы.

Для даведкі: 30.08.2016 года падпісана пагадненне паміж Магілёўскім абласным выканаўчым камітэтам і ўрадам Ленінградскай вобласці аб супрацоўніцтве ў гандлёва-эканамічнай, навукова-тэхнічнай, сацыяльнай і культурнай галінах.

Рэд.