Аўтапаркоўкі і панарамныя ліфты: над чым працуюць на прадпрыемстве «Магілёўліфтмаш»

ААТ «Магілёўліфтмаш» выпускае аўтапаркоўкі, панарамныя, разумныя і хуткасныя ліфты, расказаў у інтэрв'ю тэлеканалу «Першы інфармацыйны» генеральны дырэктар «Магілёўліфтмаша» Руслан Страхар.

У Магілёве актыўна ствараюцца хуткасныя ліфты. «Ужо зараз мы распрацавалі, вырабілі і запатэнтавалі ліфт «Магілёўліфтмаш» з хуткасцю руху 2,5 м/с. Пастаўлена задача да канца года ўжо выпрабаваць і запатэнтаваць ліфт са скорасцю перамяшчэння 4 м/с. Гэта для высокіх будынкаў больш за 40 паверхаў», - распавёў гендырэктар.

Сумесна з беларускай IT-кампаніяй на «Магілёўліфтмашы» распрацавалі сістэму «разумны ліфт». «Па сутнасці, гэта сістэма бясключавага доступу жыхара да ўсёй інфраструктуры, якая ёсць у доме. Калі чалавек заходзіць у хату, то ліфт, дзе б ён ні знаходзіўся, аўтаматычна спускаецца на першы паверх. Зайшоўшы ў яго, жыхар дома падымецца на неабходны яму паверх. Сістэму актыўна прасоўваем для новага жыллёвага будаўніцтва, - адзначыў Руслан Страхар. - Мы абсталюем нашы ліфты сістэмай відэаназірання, што вельмі запатрабавана і адказвае бяспецы. Нашы распрацоўшчыкі і канструктары разам з вытворчым падраздзяленнем могуць зрабіць аздабленне ў ліфце ў любым выкананні».

Паводле яго слоў, асартымент прадукцыі прадпрыемства даволі разнастайны. «Толькі асноўнай прадукцыі ў нас каля 200 найменняў. Ёсць пасажырскія і грузавыя ліфты рознай грузападымальнасці. Распрацоўваем панарамныя ліфты, якія ўстанаўліваем у гандлёвых цэнтрах. Можна смела сказаць, што зараз мы можам забяспечыць ліфт для любой катэгорыі кліентаў: у жылыя дамы, офісныя, адміністрацыйныя памяшканні. Акрамя таго, наяўнасць уласнага навукова-тэхнічнага цэнтра дае магчымасць распрацоўваць ліфты і для тых будынкаў, дзе, здаецца, гэта немагчыма зрабіць. У нас быў такі ўнікальны вопыт для рынку Санкт-Пецярбурга. Там традыцыйнае жыллё мае багатую гісторыю і не прызначана для ўстаноўкі ліфтаў. Аднак мы распрацавалі і зманціравалі спецыяльныя ліфты. Яны вельмі вузкія, для двух чалавек, але мы тым самым вырашылі праблему ўздыму для пажылых людзей у такое непрыстасаванае жыллё», - адзначыў гендырэктар.

Яшчэ адным новым напрамкам работы «Магілёўліфтмаша» сталі папавярховыя эскалатары, якія ўжо ўстанаўліваюцца ў гандлёвых цэнтрах краіны. «Гэта могуць быць як эскалатары, так і травалатары, якія мы выкарыстоўваем. Яшчэ адзін важны напрамак - парковачныя сістэмы. Мы распрацавалі і ўкаранілі ўласныя парковачныя сістэмы ротарнага або, як мы называем, карусельнага тыпу ад 10 да 12 машына-месцаў. Акрамя таго, распрацавалі капітальную пабудову, дзе, па сутнасці, паркоўка ліфтавага тыпу. Такія паркавальныя сістэмы дазваляюць адначасова захоўваць да 50 аўтамабіляў», - распавёў Руслан Страхар.

Ён дадаў, што ў Беларусі быў прыменены комплексны мэтанакіраваны падыход па замене ліфтавага абсталявання, якое адпрацавала свой устаноўлены тэрмін. «У нашай краіне, як і ў многіх іншых, гэта 25 гадоў. Па даручэнні Прэзідэнта была распрацавана адпаведная праграма па паскоранай замене ліфтаў. З 2018 года «Магілёўліфтмаш» у адпаведнасці з гэтай праграмай па краіне памяняў прыкладна 12,5 тыс. ліфтаў», - дадаў Руслан Страхар.

Гендырэктар таксама расказаў, на якія лічбы плануе выйсці прадпрыемства сёлета. «Магілёўліфтмаш» - экспартна арыентаванае прадпрыемства. Увесь рынак краіны (уключаючы новае будаўніцтва і замену ліфтаў) мы ацэньваем каля 3 тыс. ліфтаў. Астатняе - гэта экспарт. Вядома, шмат у чым мы залежым ад нашых партнёраў на постсавецкай прасторы. Зыходзячы з колькасці насельніцтва, асноўны наш рынак – Расійская Федэрацыя. Менавіта туды мы арганізуем асноўныя пастаўкі на экспарт. Акрамя таго, традыцыйна пастаўляем абсталяванне ў Казахстан, Арменію, сёлета атрымалі значны кантракт на пастаўку ў Азербайджан. Гэта таксама для нас важны напрамак», - звярнуў увагу ён.

Паводле яго слоў, на такія аб'ёмы паставак вытворчых магутнасцей хапае. «Мы ўвесь час працуем над мадэрнізацыяй. Для гэтага актыўна прыцягваем інвестыцыі. За апошнія некалькі гадоў мы рэалізавалі адразу тры інвестыцыйныя праекты. Яны датычыліся як асноўнай нашай пляцоўкі вытворчасці ліфтаў, так і вельмі важнага напрамку - электрарухавікоў. Цягавыя электрарухавікі - новы напрамак для нашай краіны, абсалютнае імпартазамяшчэнне. Па праграме электратранспарту «Магілёўліфтмаш» вырабіў іх для электробусаў, тралейбусаў, трамваяў. Цяпер мы актыўна гэты напрамак прасоўваем на рынак Расіі, дзе, безумоўна, ёсць свае рэгламент, умовы, але мы ўжо зараз з партнёрамі зрабілі спецыяльныя цягавыя электрарухавікі па іх тэхнічных нормах і патрабаваннях», - адзначыў Руслан Страхар.

БЕЛТА