«Барысфен» і «Гродна-93» перамаглі на фінішы рэгулярнага сезона чэмпіянату Беларусі

На мужчынскім чэмпіянаце Беларусі па баскетболе завяршыліся матчы рэгулярнага сезона.

Лідэры першынства баскетбалісты «Гродна-93» упэўнена перайгралі на выездзе дзеючага чэмпіёна краіны БК «МІНСК» - 77:68. У Магілёве мясцовы «Барысфен» пасля трох фіяска запар перамог сталічны «Імпульс-БДУІР» з лікам 80:57. Выніковае становішча: «Гродна-93» - 57 ачкоў, «Барысфен» - 52, «МІНСК» - 51, «Рубон» (Віцебск) - 48, «Імпульс-БДУІР» - 32 ачкі.

У спаборніцтвах жаночых каманд заўтра адбудуцца першыя матчы за выхад у паўфінальную стадыю. Чэмпіёнкі краіны баскетбалісткі «МІНСКА» прымуць на сваёй пляцоўцы «Гомельскіх рысяў», пераможцу гэтай пары ў паўфінале чакае сустрэча з лідэрам рэгулярнага сезона «Гарызонтам». Пераможца супрацьстаяння маладзёжнай каманды БК «МІНСК» і «Гарызонта-2-РЦАП» згуляе ў паўфінале з гродзенскай «Алімпіяй».

БЕЛТА