«Магілёў» адыграўся з ліку 2:5 і перамог «Авіятар» у экстралізе

Хакеісты «Юнацтва», «Ліды» і «Магілёва» атрымалі перамогі ў суботніх матчах рэгулярнага чэмпіянату беларускай экстралігі сезона-2025/26.

Самы дзейсны паядынак дня быў згуляны ў Баранавічах, дзе мясцовы «Авіятар» прымаў «Магілёў». Пасля двух перыядаў гаспадары былі наперадзе з лікам 4:1, за 10 хвілін да фінальнай сірэны «лётчыкі» вялі 5:2, але за астатні час госці здолелі не толькі зраўняць лічбы, але і вырваць перамогу - 6:5. Вырашальную шайбу за «львоў» закінуў Аляксандр Шурыгін. «Авіятар» падоўжыў серыю паражэнняў да 11 матчаў, «Магілёў» атрымаў толькі чацвёртую вікторыю ў сезоне і працягвае замыкаць турнірную табліцу.

Паралельна на поўначы краіны «Віцебск» прымаў лідэра чэмпіянату «Юнацтва». Па ходзе сустрэчы мінчане ўпусцілі перавагу ў дзве шайбы, зыход гульні вырашыўся ў серыі булітаў, дзе дзеючыя чэмпіёны ўсё ж здабылі два ачкі - 3:2. Сталічны клуб не прайграе на працягу шасці матчаў. Таксама 22 лістапада «Ліда» дома была мацнейшай за «Шахцёр» (4:1), дубль за «рыцараў» аформіў Максім Чубукоў, тры галявыя перадачы аддаў лепшы бамбардзір экстралігі Максім Кунішнікаў.

БЕЛТА