Баскетбалісты «Барысфена» ўпершыню выйгралі Кубак Беларусі

Баскетбалісты магілёўскага «Барысфена» ўпершыню сталі ўладальнікамі Кубка Беларусі.

На паркеце мінскага спарткомплексу РГУАР 29 снежня падапечныя Андрэя Крываноса перамаглі «Гродна-93» з лікам 83:75.

У сустрэчы за бронзавыя ўзнагароды баскетбалісты «МІНСКА» разграмілі віцебскі «Рубон» з розніцай у 46 ачкоў - 100:54.

Напярэдадні ў паўфінале магіляўчане ў трэцім авертайме з лікам 108:102 здолелі перайграць мінчан, якія да гэтага выйгравалі Кубак краіны 14 разоў запар. Гродзенскія баскетбалісты былі мацнейшымі за віцябчан - 103:70.

Лепшым іграком кубкавага турніру прызнаны магіляўчанін Андрэй Рагазенка.

Раней баскетбалісткі «Гарызонта» чацвёрты раз запар сталі ўладальніцамі Кубка краіны сярод жаночых каманд, адолеўшы ў фінальнай сустрэчы баскетбалістак «МІНСКА» - 77:67. У гульні за бронзавыя ўзнагароды гродзенская «Алімпія» разграміла «Гомельскіх рысяў» з вынікам 99:65. Лепшым гульцом жаночага кубкавага розыгрышу была прызнана адна з лідэраў «Гарызонта» Анастасія Верамеенка.

БЕЛТА